An inlan hmasak berah title cho phakin kai thar, Luangmual an inlar a, Thawhlehni zan Tata SK Pro Volleyball League-ah 3-1-in Power Department Sporting Club an hneh.

R Dengṭhuama Indoor Stadium, Mualpuiah Nipa Barad leh Lalmuanpuii'n lehlam theihna an hliahkhuh hneh hle a, 25-19, 25-16, 20-25, 25-15-in Luangmual an chakpui.

Mizorama a inkhelh hmasak ber Ahmedabad tleirawl Nipa chuan point 31 vaw chhuakin 19 a hloh a, D3 Business Player of the Match lawmawm a dawng a ni.

A kawppui Kolasib nula Muani'n point 21 hmuin 11 a paih ve thung a; Power tan mi mala thawh hlawk ber Vanlalremruati'n point riat hmuin point thum a hloh. 

Team pahnih player chet dan khaikhinin an inkhan lo a, an ball vuak a inthlauh bakah Luangmualin danglamna siam thei player duhthlan tur an ngah zawk bawk a, Muani leh Nipa bakah R Malsawmtluangi'n tihsual tum sarih nei mah se vawi 13 a vaw tla.

Luangmualin 2019 Pro Volleyball player ṭha ber, Muani kawl mah se team tihchak leh zual nan Gujarat tan National Beach Volleyball silver leh Youth National Games Volleyball gold medal awrh tawh, kum 18 mi, Nipa an la lut a, an vawi khat telnaah champion an tum tih an lantir.

Thla thara India Under 19 camp zawm tur, Nipa hian team inbuatsaihna zawm tam hman lo chungin tawn hriat nei, Muani thlazar hnuaiah ngampa tak leh hmasawn zawngin ke a pen a. Power-in chhang let thei tur khawpa theihna nei an kawl lo va, an dang hneh lo.

Set hmasa pahnihah nuam ti takin Muani'n a khel a, point 17 hlawh chhuakin ṭum li chiah a paih. Nipa chuan vawi 15 hlap tla mah se tihsual vawi riat neiin a hniam zawkah a awm a, chutih chungin Luangmualin an thunun hneh.

Eng emaw chen club tihtawp a nih hnua intuai thar leh, Power-in 2000 hma lama hriat hlawh tawh, veteran setter Lalropuii ko kirin, an champion kum 2017-a rinrawl, Vardingliani nen inkawp leh mah se an tha a ṭhum tawh deuh. Set thumnaah erawh tawn hriat an neih chhawrin el tham an la ni tih an entir a, lehlam tlahniamin point 20 chiah an hmu ve hman.

Insawrbing mamawh Luangmualin set an hloh hnuah Nipa chuan kawng dikah a hruai kir leh nghal a, a ball vuakna a sangin Mizo hmeichhiate aiin a kutthlak a nât bakah a hnung aṭang pawhin a hlauhawm a, a service lak an harsat tel. 

Mizo zinga a inkhelh vawi khatnaah Nipa a hlim a, lawm takin Luangmualin hun tawp an hmang bawk. An khelh dan aṭangin an elpuite tan vaukhan an chhuah a, Inrinni tlaiah champion lai, Bethlehem Vengthlang nen an intawng leh dawn a, kar leh Thawhtanni tlaiah Power-in Bungkawn an hmachhawn ve thung ang.

RESULT 

June 6, 2023 - Thawhlehni zan

Luangmual bt Power Department Sporting Club (hmeichhia)
- 25-19, 25-16, 20-25, 25-15 (3-1)

D3 Business Player of the Match
-  Nipa Barad (Luangmual)

Stats :

LUANGMUAL
Nipa Barad: point hmuh - 31, point hloh - 19
Lalmuanpuii:  point hmuh - 21, point hloh - 11
R Malsawmtluangi: point hmuh - 13, point hloh - 7
Hmingthazuali: point hmuh - 5, point hloh - 7
Zorempuii: point hmuh - 2, point hloh - 1

POWER
Vanlalremruati: point hmuh - 8, point hloh - 3
Vardingliani: point hmuh - 3, point hloh - 3
Lalrammawii: point hmuh - 6, point hloh - 9
FP Lalduhkimi: point hmuh - 3, point hloh - 5

FIXTURE

JUNE 8 (NINGANI) :
01:30 pm : Bethlehem Vengthlang v Kanan (hmeichhia)
03:30 pm : Chhinga Veng Spikers v Tuipuiral (mipa)
08:00 pm : Hunthar v Tuichangral (mipa)