Tun season-a volleyball inelna vawi hnih awm tawha champion ve ve, Kanan chuan nomawi pathum nena season khar an tum mek a. Zaninah inelna ngaihhlut hlawh ber, Pro Vollleyball-ah fiahna hautak an hmachhawn phawt a ngai dawn a, champion lai, Bethlehem Vengthlang nen final luh an inchuh dawn.

Tata SK 712 Pro Volleyball League khelh mekah champion lai, Bethlehem Vengthlang hian league round-ah Kanan hi an lo hneh lo tawh a; mahse, inrintawkna an neih san lai tak niin nikuma player tha bera thlan leh kuminah pawh innghahna tham, Elisian Medai hovin an thawk chhuak dawn.

R Dengthuama Indoor Stadium, Mualpuiah June 8 khan team pahnih hi intawng tawhin Kananin 3-1-in Bethlehem Vengthlang an hneh a, tun tumah pawh hian rin hlawh zawk an ni a; mahse, league an khelh hnuhnun an tlawm a, insiam that an mamawh lai takin an khelh hnuhnun vawi hniha chak zawn mek, champion lai nen final luh an inchuh dawn a ni.

Tun season vawi hnih nomawi pahnih la tawh, Kanan an champion ve ve a, nomawi pathum nen kum khar tur leh a vawi khat nana Pro Volleyball champion ni tura beiseina sang tak an nei a; mahse, Zirtawpni khan harsatna an tawk a. Set an lak hmasak hnuah an elpui, Luangmual ngam lovin an tlawm a, an boruak a hniam lai takin fiahna dang an hmachhawn zui a ngai dawn a ni.

Kanan player-te intluk tlang hle mah se inelna nasa leh boruak sangah danglamna siam tura filawr an awm lo va, dinhmun tha lo atanga team chawi kanga kawng dika hruai thei an neih loh avangin Luangmual hmaah an talbuai.

Vawi nga an khelh tawhah Lalramliani leh R Laltleipuii ten point 50 ve ve thawk chhuakin Lalbiakngheti’n 40, Lalhriatpuii leh B Tlangmawii Varte ten 30 chuang ve ve an hlawh chhuak bawk.

Bethlehem Vengthlangin league vawi nga an khelhah Kanan leh Luangmual an hneh lo a, chutih rualin an khelh hnuhnunah set hloh lo ve vein Durtlang leh Power an hneh zawn.

Nikuma an champion theihna kawnga thawh hlawk ber leh player tha ber lawmman dawngtu, Elisian-i chuan a vanglai hmang leh mekin an khelh hnuhnun vawi hnihah point 47 hmuin tum kua chiah a tisual a, a vaiin point 108 thawk chhuak tawhin 34 a hloh.

An tlawmna chhang leta kum zawna final lut turin Serkawn Lunglei nula, Elisian-i chungah an innghat thuk hle dawn tih a chiang a, an player dangte erawh Kanan el thei turin an theihna a sang tawk lo vek a, thiam taka an khelh a ngai dawn a ni.

Kanan leh Bethlehem Vengthlang inkhela chak zawk zawk hian final-ah Bungkawn hnehtu, hneh loh la nei lo, Luangmual an hmachhawn zui ang.

Stats:
KANAN (play 5, won 4, loss 1):
Lalramliani: point hmuh 50, point hloh 18
R Laltleipuii: point hmuh 51, point hloh 23
Lalbiakngheti: point hmuh 42, point hloh 16
Lalhriatpuii: point hmuh 39, point hloh 25
B Tlangmawii Varte: point hmuh 32, point hloh 28

BETHLEHEM VENGTHLANG (play 5, won 3, loss 2):
Elisian Medai: point hmuh 108, point hloh 34
VL Hmangaihzuali: point hmuh 23, point hloh 18
Lalchhandami: point hmuh 20, point hloh 18
Elina B Lalenkawli: point hmuh 9, point hloh 4
CS Zonunmawii: point hmuh 14, point hloh 26