Kananin nomawi pathum nena season khar an tumnaah beiseina nung insiam thar zelin Thawhtanni zan Tata SK 712 Pro Volleyball League semifinal-ah 3-0-in champion lai, Bethlehem Vengthlang an hneh a, league round-a an hneh loh Luangmual nen champion nih an inchuh dawn.

R Dengthuama Indoor Stadium, Mualpuiah Kananin thawh hona tha an lantir a, 25-12, 25-17, 25-17-a an chak rualin an khelh tawha an chet that ber ni hiala mawiin an inlan.

June 8 khan Bethlehem Vengthlang nen intawng tawhin 3-1-in an chak a; mahse, league an khelh hnuhnun berah Luangmual an hneh lo va, an khelh danah Kananin beisei an pha lo.

Bethlehem Vengthlang erawh an khelh hnuhnun vawi hnihah an chak zawn a; inkhel pawimawhah an tlawm tawhna chhang let tura inrintawkna an neih thar leh lai takin Kanan hniam lai an tawng.

Mahse, team pahnih player-te theihna a insan hleih tih Kananin an lantir nawn leh zawk a, an khel a puitlingin a fel fai a. Inelna sangah ho taka tihsual nei mang lovin insawrbing takin inkhel an thunun tluan.

R Laltleipuii’n point khat chiah hlohin tum 16 a vaw tla a, D3 Business Player of the Match lawmman a dawng a. Lalramliani’n point kua leh Lalhriatpuii’n point sarih an hmu a, vawi khat ve ve chiah an tisual.

A tir atangin a boruakah Kanan an chungnung nghal a, Bethlehem Vengthlang innghahna, Elisian Medai’n line pawnah vaw chhuakin Chinglunkimi’n a vaw kai lo zui ve leh a, 23-10-in an sang a, an inel tawk lo.

A hnu zelah thil awm dan a danglam tam lo va. Khela bet zawk an nih miau avangin Bethlehem Vengthlangin lehlam vuak lak tumin hun an hmang tam a, Mizo spiker tha ber pawl, Elisian-i’n a theihna hmang chhuak turin hun tha a nei tam thei lo.

2022 Pro Volleyball player tha ber leh Bethlehem Vengthlang champion-puitu, Serkawn Lunglei nula hian point 10 thawk chhuakin point sarih a hloh va. Ball tha a hmuh tam tawk loh piah lamah Kanan player-ten net bulah a ball hlap an dansak thin bakah an laksak hnem viau bawk.

Lalramengi Ralte chuan tum ruk hlap thlain vawi khat chiah tisual mah se Bethlehem Vengthlang a chawi kang zo lo a, Kanan tan player-ten awmze nei tham takin an khel ve thung.

Tleipuii’n a hlap tlak zawn hnuah tha taka a service atangin point a hmu zawn leh a, 24-16-in an kalsan a. Lehlamin point khat bak hmuh belh thei lovin Lalbiakngheti’n set an lak zawn nan a beng thla a, a vaiin point sarih thawk chhuakin vawi thum a hloh.

Set thumnaah Elisian chuan vaw tlain Bethlehem Vengthlangin 14-14 thlengin nih rual chho mah se, kum lama naupang leh thiamna tlachham zawk an nihna a lang zui leh a. 23-17-a Kananin hma an hruai laiin Tleipuii’n a hlap tla a, lak theih lohin a service zui leh nghal a ni.

Kananin trophy pathum la chunga season khar an tumna an kalpui zel a, Ningani zanah a vawi khat nan Pro Volleyball final an khel dawn a. Champion turin an hneh loh tawh, Luangmual lakah danglamna an mamawh a, hmabak hlen tur an nei.

Stats:
KANAN:
R Laltleipuii: point hmuh - 16, point hloh - 1
Lalramliani: point hmuh - 9, point hloh - 1
Lalhriatpuii: point hmuh - 7, point hloh - 1
Lalbiakngheti: point hmuh - 7, point hloh - 3
B Tlangmawii Varte: point hmuh - 3, point hloh - 5

BETHLEHEM VENGTHLANG:
Elisian Medai: point hmuh - 10, point hloh - 7
Lalramengi Ralte: point hmuh - 6, point hloh - 1
Lalkhumtiri: point hmuh - 4, point hloh - 0
Lalchhandami: point hmuh - 6, point hloh - 4
CS Zonunmawii: point hmuh - 5, point hloh - 4
Elina B Lalenkawli: point hmuh - 1, point hloh - 2
Flora Lalrinmawii: point hmuh - 1, point hloh - 4
Chinglunkimi: point hmuh - 0, point hloh - 4

FIXTURE:
MIPA SEMIFINAL:
JUNE 27 (THAWHLEHNI):
08:00 pm: TNT v Tuichangral

JUNE 28 (NILAINI):
08:00 pm: Chhinga Veng Spikers v Hunthar