Thutak Nunpuitu Team-in an la thlen ngai loh ramtiam hnaih zelin Thawhlehni zan Tata SK 712 Pro Volleyball League-ah 3-1-in Tuichangral an hneh a, kum zawnin final an lut.

R Dengthuama Indoor Stadium, Mualpuiah a hma ang bawkin TNT-in inelna nasa leh boruak sangah team tha leh tlo zawk an nihna an lantir nawn leh a, 25-23, 18-25, 25-19, 25-20-in an chak.

June 12 khan intawng tawhin vawi nga an deuce hnuah 30-28-in Tuichangralin set khatna an la a. TNT-in hneh taka an nawr let hnuah set thum an la zawn a, semifinal-ah set an lak dan danglam hret mah se Tuichangral set lak a pung chuang lo.

Vanlaltanchhana (Valbuanga) chuan vawi 24 vaw tlain point 10 a paih a, championship kal meka tum ruk an khelh tawhah a vawi nga nan D3 Business Player of the Match a ni a. A elpui, Tuichangral Haryana spiker Vinod Khatkar chuan point 24 tho hlawhin 11 a hloh.

Nikum semifinal-ah TNT-in league-a chak fai vek, Hunthar lehthalin 3-2-in an hneh a, final-ah Durtlang North nen intawngin set khat chiah an la a. Pro Volleyball hmasa ber 2016 khan league-a sang ber ni chungin final an khel ve thung a, Anastasia Electric Veng hneh lovin ramtiam an thleng phak lo.

Kum kal taa an player-te vek tho kha hmasawn leh hriam zawkin an inlan a, an thlen chin atanga hmasawn turin khelh khat chak an la bak a. Mizo hlanga champion hmasa ber nih tumin vawi thum final an luhna a ni a, Hunthar leh Chhinga Veng Spikers inkhel chak zawn nen Zirtawpni zanah hmawr an bawk ang.

2018-a final khel tawh, Tuichangralin a tum hnih nan semifinal pal tlang an tumna an puitlin zo lo ve thung a. Set khatna laihawl atangin an insawrbingna tlahniamin ho taka point hloh an neih zauh zauh avangin TNT-in 17-14-in an kalsan a, setter Lalliankima’n hui tlain 23-16-in an sang zui leh.

Lalhmunmawia (Mapuia) chuan tum hnih leh Saidingpuia Sailo chuan vawi khat vaw tla zawn chhovin 24-23-in an inkar pawt zim leh mah se Valbuanga hlap dang zo lovin TNT an tlang.

Set an lak hnuah TNT-in buai rukna an neih a lang chhuak a, taksa chak tawk lo chunga khel Makima’n nam sualin 11-7-in Tuichangralin hma an hruai a. An ralthuam pawimawh - Saitea, Vinod leh Mapuia’n nuam ti takin an vua.

TNT-in inkhel tihdanglam tumin K Zodingliana an dah lut a, ani hian set hnihnaa an point hmuh hnuhnung ber thawk chhuakin 18-ah an tawp a. Coach Lalhmangaihsanga Sailo chuan team rem khawm thar leh turin setter rinrawl, Makima a chawlhtir a, F Lalrinngheta a dah lut.

Tuichangralin inrintawkna nen set thumna bul an tan a, net chungah Saitea’n Zodinga hlap dang tlain Laldinchhunga vuak an dan leh hnuah Valbuanga’n a vaw kai lo va, 7-3-in an sang.

Mahse, a hniam zawk atangin TNT-in paukhauh takin an bei let thei a, Zosangzuala (Mama) chuan Vinod-a vuak dang thlain 10-10 a nih hnuah Valbuanga’n Lalchhanhima hlap a dang zui ve leh a, an lehpel.

Tuichangralin dinhmun tha lo atanga kir leh an harsat a, infuih phur aiin an chet dan leh an hmel atangin lungawi lohna a lang a, player siksawi kawngah thuthlukna an siam fuh tawk lo bawk a. Zuan laia net tawh leh ho taka point hloh an neih thin an tuar tel.

A tir lama chet harsat, Valbuanga’n a hnung leh hma atangin rin tlakin a khel a, Mapuia vuak chhang leta a hlap tlak rualin 24-19-in TNT an sang a. Vinod chuan line pawnan hlap chhuak zui ve thungin dinhmun derthawngah Tuichangral an tlu lut a, set hloh zui a thiang tawh lo.

TNT-in Makima dah lut lehin a tira lut paruk hmangin phur takin an khel thar leh a. Vuak tlak leh net bula lo dan bakah libero Lalramnghakdika chuan ball tla tur a chhan hnem a, thiamna pawimawh hrang hrangah league-a an intawn tum ang bawkin Tuichangralin an el zo lo.

Mama’n a hui thlak hnuah chiang takin a hlap tla a, 19-14-in TNT an sang a. A kawtawpa tang tawh, Tuichangralin Vinod an chhawr rim a, a vuak tlak hnuah Sadraka hlap an dansak a, 21-20-in an hnaih leh hman.

Mahse, beiseina an neih lai takin Valbuanga’n vawi hnih a vuak tlak kar lakah Vinod-a hlap an dang thla tel a, 24-20-a hniam zawk an nih hnuah Tuichangral tan kir leh rual a ni tawh lo.

TNT captain Vanlalchhantluanga Sailo chuan vuain lo dang leu mah se lak phak lohin a tla a, hnehna lawma hlim au thawm ri hum humin Tuichangral a chhilh hnan ta a ni.

Team tichaktu pawimawh, Dinchhunga’n point 15 hmuin tum sarih a tisual a, Mama’n point li hlohin vawi kua a thawk chhuak a. Tuichangral tan Khawhai tlangval, Saitea leh Mapuia’n point 15 leh 10 hmuin an hloh belh khawmin 14 a ni ve thung.

Stats:
TNT:
Vanlaltanchhana: point hmuh - 24, point hloh - 10
Laldinchhunga: point hmuh - 15, point hloh - 7
Zosangzuala: point hmuh - 9, point hloh - 4
Vanlalchhantluanga Sailo: point hmuh - 7, point hloh - 4
Sadrak Fanai: point hmuh - 6, point hloh - 5
K Zodingliana: point hmuh - 5, point hloh - 4

TUICHANGRAL:
Vinod Khatkar: point hmuh - 24, point hloh - 11
Saidingpuia Sailo: point hmuh - 15, point hloh - 6
Lalhmunmawia: point hmuh - 10, point hloh - 8
Lalchhanhima: point hmuh - 4, point hloh - 5
Thangminlal: point hmuh - 5, point hloh - 7

FIXTURE:
JUNE 28 (NILAINI) - SEMIFINAL
08:00 pm: Chhinga Veng Spikers v Hunthar (mipa)

JUNE 27 (NILAINI) - FINAL
08:00 pm: Luangmual v Kanan (hmeichhia)