Hunthar coach VL Malsawma Renthlei chuan an hneh tawh, Chhinga Veng Spikers chu anni aia team tha zawk an nih thu a sawi a, Tata SK 712 Pro Volleyball League semifinal hnuhnung zawkah an inhmachhawn dawn.

Zirtawpni zan khan league kharnaah intawngin, set la hmasa zawk ni zel chungin Huntharin a tawpah 3-2-in an hneh a. Vawi nga theuh an khelhah point 10 ve ve an hmu a, chak tlem zawk an nih vangin Chhinga Veng an hniam zawk.

Nilaini zanah R Dengthuama Indoor Stadium, Mualpuiah final luh inchuhin an inkhel leh nghal dawn a, Hunthar player pawimawh, Zomuansanga’n a ke a tihnat avangin a dinhmun a chiang lo.

Keini aiin an tha - Hunthar coach
Sawma chuan, “Championship kal mekah keini aiin Chhinga Veng an tha zawk. Chuvangin, kan hneh dawn a nih chuan a tha thei ang bera kan khelh a ngai,” a ti.

Tun season-a inelna vawi hnih awm tawhah Hunthar an champion ve ve a, rin ber ni chungin Pro Volleyball-ah bul an tan a. TNT tih loh team dang hneh vek mah se, an inlan hnuhnun vawi thumah chet an harsatin Tuipuiral leh Spikers lakah hnehna an sual chhuak hram.

Sawma chuan, “Keini hi team inkhairual tha tak anga kan lan laiin thenkhat an lo uaithla lam deuh tawh a, kan beisei ang takin kan khel chhuak zo bik lo.

“Chhinga Veng kan hneh tawhna kha chu awmze nei lo a ni a, chak tumin min khel lo va, inzir nan min hmang ni berin ka hria,” a ti a, hemi tum hian Zomuana’n a ke ding lam a bilh tawh bilh nawn lehin lak chhuah a ni a, Thawhlehni thlengin a la ring ngam tawk lo.

Khawhai tlangval hian vawi nga an khelh tawhah point 59 hlawh chhuakin 37 a paih a, Punjab police Gagandeep Singh chuan point 110 hmuin 53 a hloh ve thung a, ani tih lohah Hunthar tana thawh hlawk a ni.

2017 leh 2018 champion Hunthar boss Sawma chuan, “Semifinal-ah vawi hnih kan tla zawn mek a, engti zawng pawhin chak kan duh tak zet a, theihpatawp kan chhuah a ngai hle a ni,” a ti.

Chhinga Veng an hneh tumin captain Remsangzuala’n a khel tha hle a, setter zinga khel tha bera thlan hmasak ber leh awm chhun a ni rih a. Ani hi Hunthar chakna hnar pawimawh niin tawn hriat nei tha, Laldensanga leh Lalramnunfela’n sang lai leh hniam chang an nei a, point 47 leh 38 an thawk chhuak tawh.

Spikers tan pawimawh Javed leh Biakmuana
Chhinga Vengin nikumah chhiat an tawk nasa a, champion lai ni chunga league vawi li an khelhah an tlawm vek a. 2022 champion Durtlang North atangin Lalbiakmuana an lak luh bakah Rajasthan atanga an chawk luh, Javed Khan nen team danglam an din.

Coach Jesse Lalpianpuia chuan Hunthar nen an inkhelh tumin set thumna leh linaah Javed a awltir a, “Kha inkhel khan awmzia a nei tam tawh lo va, inhliam palh a hlauhawm avangin player thenkhat kan hahdamtir a ni,” a ti.

A vawi hnih nan champion thei turin Spikers-in beiseina an nei a, an khelh tawhah Javed chuan point 150 deuhthaw hmuin 61 a hloh a, Biakmuana’n 21 a paih laiin 80 a thawh bakah, zuan sang K Lalfakawma’n point 55 a hlawh chhuak bawk.

Jesse-a chuan, “A laiah kan nawr fuh chuan kan chan a tha dawn a, kan khelh chhoh dan atangin Hunthar hneh theih kan inbeisei. State dang atanga kan player lak a tha a, lehlam ban pharna chungah a vaw thei a, ani hi kan tan a pawimawh,” a ti.

3-1-a Durtlang North an hneh tumin Javed chuan vawi 41 vaw tlain 15 a hloh a, a la chet that ber a ni a. Biakmuana’n tihsual a nei tlem a, Hunthar hmaah vawi 22 hlap tlain inkhel tum khata point 20 a hmuh awm chhun a ni ve thung.

Captain leh setter ni bawk, David Lalramhmachhuana chet danah 2019 champion Spikers an innghat tel hle ang tih a chiang a. Lehlam setter Remsangzuala nen team inhnehtawk leh intluk tawk kara danglamna siam turin hmun pawimawh an luah dun dawn a ni.

Stats:
HUNTHAR:
Gagandeep Singh: play 5 (point hmuh - 110, point hloh - 53)
Zomuansanga: play 5 (point hmuh - 59, point hloh - 37)
Laldensanga: play 5 (point hmuh - 47, point hloh - 20)
Lalnunfela: play 5 (point hmuh - 46, point hloh - 21)
Lalramnunfela: play 5 (point hmuh - 38, point hloh - 19)

CHHINGA VENG:
Javed Khan: play 5 (point hmuh - 149, point hloh - 61)
Lalbiakmuana: play 5 (point hmuh - 80, point hloh - 21)
K Lalfakawma: play 5 (point hmuh - 55, point hloh - 29)
PC Lallianmawia: play 5 (point hmuh - 38, point hloh - 18)
Samuel VL Nunhlima: play 3 (point hmuh - 26, point hloh - 9)
Joseph Lalbiaksanga: play 4 (point hmuh - 22, point hloh - 8)