Pro Volleyball League khelh mekah Aizawl pawn lam atanga inlan hmasa ber, Tuichangral chuan khawpui atanga nomawi hawn ngei an tum a, an hneh loh tawh, Mizo hlanga champion tum ngam, Thutak Nunpuitu Team an hmachhawn dawn.

Tuichangralin league round-a TNT laka an tlawm tawhna chhang let turin hun tha an nei niin an inngai a, Tata SK 712 Pro Volleyball League semifinal-ah Thawhlehni zan hian R Dengthuama Hall, Mualpuiah hneh lo nei lo team an hmachhawn dawn.

Hmasawnna tur pahnih nei Tuichangral
Tuichangral head coach David Aizampuia Fanai chuan league round-a TNT laka an tlawm tawhna chhang let turin hun tha an nei niin a hria a, a vawi hnih nana final luh tumin theihtawp an chhuah dawn a; an inkhelh tawhah TNT ngam lo viau mah se thil pahnihah hma an sawn phawt chuan an chak theih a beisei.

June 12 khan vawi nga an deuce hnuah Tuichangralin 30-28-in set hmasa ber an la na a, tunlaia team khawng leh inpumkhat tha ber, TNT-in nawr letin set thum an la zawn zui a ni.

David Fanai chuan, “Kan inkhel kha ngun takin ka ennawn a, net bulah kan vuak dang turin ban an phar taimain a phui bik hle a, vuak leh ball ber an la thei zawk hle bawk.

“Ball vuak hrim hrimah an tha bik lo. Mahse, block leh defence-ah kan tluk lo va, insiam thata hmasawn ngei turin theihtawp kan chhuah dawn a ni,” a ti.

Aizawl pawn atanga Pro Volleyball-a tel hmasa ber, Tuichangral hian season khat an hmanna, 2018-ah final an lut a, an hmaah fiahna hautak, TNT a awm a, a vawi hnih nan final luh ngei tumin an inbuatsaih.

An khelh hnuhnun berah 3-2-in Tuipuiral an hneh hram a, league-ah palina ni chungin knockout round an lut a. Mizo hlanga champion hmasa ber nih tumin TNT-in an bitum an hneh fai vek ve thung.

Saitea a khelh theih beisei
Tuipuiral nen an inkhelh laiin Tuichangral rinrawl Saidingpuia Sailo chuan a ke a tina a, Hunthar nen an inkhelh tumin hliam vangin hun pawimawhah lak chhuah a ni tawh bawk bawk a; mahse, coach-in semifinal-ah a inlan theih a beisei.

David Fanai chuan, “Tha tawm vangin harsatna a tawk thin a, ruh khawiha hliam na tak a ni lo. A khelh theih ngei kan ring,” a ti a, vawi nga an khelh tawhah Saitea hian point 84 thawk chhuakin 50 a hloh a, a thawh hlawk tak zet.

Tuipuiral nen an inkhelh lai thovin setter Hmangaihthanga a thlak a, Lalrinchhana hmangin set hnuhnung pahnih an la zawn a; mahse, an khelh dan pangngaiin Hmangaiha tho an hmang zui leh ang.

Haryana atanga an lak luh, Vinod Khatkar chuan point 124 hlawh tawh mah se vawi hnih chiah an la chak a, 57 a hloh a. Ball vuakah an chhe lo va, Saitea bakah danglamna siam tura rin ngam Lalhmunmawia’n point 20 hloh tawhin 60 a hmu tling ve thung.

Rin hlawh Mizo val rual
Pro Volleyball hmasa ber, 2016 khan league-ah TNT an sang ber a, rin hlawh tak ni chungin final-ah an chak zo lo va. Nikumah knockout round lut team pali zingah an hniam ber a, semifinal-ah league-a chak vek, Hunthar lehthalin a vawi hnih nan final an lut.

2022-a Hunthar dinhmun ang kha tawng mekin rin hlawh ber tih ngam an ni a, an lakah beiseina a san avangin boruak rit takin a delh tel a; chutih laiin nikuma an player-te vek hmang chungin kuminah hma an sawnzia an lantir mek.

Superstar Vanlaltanchhana’n point 118 vaw chhuakin 34 a paih a, Tuichangral an hneh tumin tum 31 vaw tlain vawi nga chiah a tisual a. A pum puiah player tha ber ang hiala ngaih mek a ni a, D3 Business Player of the Match-ah tum li thlan a ni tawh.

Tuipuiral an hneh tumin TNT tichaktu pawimawh, Zosangzuala leh Laldinchhunga an awl a, vawi li ve ve an khelhah point 40 chuang ve ve an thawk chhuak a; team inkhairual tak an nih avangin sut an harsa a, Sadraka Fanai chuan point 42 a thawk chhuak tawh bawk.

Net bula lehlam vuak dan kawngah TNT an tha a, Zosangzuala leh Sadraka’n an thawh hlawk a. Chutih laia an team tinunga tichaktu pawimawh tak chu setter Lalliankima a ni a, Tlangsam player hian a nupui rai teuh tawh a kalsan.

An khelh hmasak berah Durtlang North hneha hlim taka hun an hman laiin a nupuiin fa a hrinsak a, hmu ve thei rih lovin TNT tan hmabak pawimawh ber hlen tumin a insawrbing zui zel a ni.

Stats:
TNT:
Vanlaltanchhana: play 5 (point hmuh - 118, point hloh - 34)
Zosangzuala: play 4 (point hmuh - 43, point hloh - 9)
Sadrak Fanai: play 5 (point hmuh - 42, point hloh - 15)
Laldinchhunga: play 4 (point hmuh - 45, point hloh - 23)
Vanlalchhantluanga Sailo: play 5 (point hmuh - 22, point hloh - 15)

TUICHANGRAL:
Vinod Khatkar: play 5 (point hmuh - 124, point hloh - 57)
Saidingpuia Sailo: play 5 (point hmuh - 84, point hloh - 50)
Lalhmunmawia: play 5 (point hmuh - 60, point hloh - 20)
Vanlalthlamuanpuia Sailo: play 5 (point hmuh - 22, point hloh - 10)