2017 leh 2018 champion, Huntharin lungthu kim tumin tha takin bul an tan a, Tata SK 712 Pro Volleyball League an khelh hmasak berah 3-1-in Tuichangral an hneh.

Ningani zanah hmuhnawm takin R Dengthuama Indoor Stadium, Mualpuiah an inkhel a, 25-20, 21-25, 25-23, 25-20-in insawrbing rei thei leh inthunna nei tha zawk, Hunthar an chak.

Mizoram volleyball-a inelna sang leh inbeihna nasaah Punjab spiker Gagandeep Singh chuan Hunthar a tanpui a, point 25 vaw chhuakin point 10 a hloh a, a hnung atanga a hlap thlak hmangin set khatna an la.

Vinod Khatkar leh Khawhai tlangval, Saidingpuia Sailo chuan Tuipuiral an nawr kal ve thung.

23-20-a sang zawk an nih hnuah Vinod chuan vaw tla zawnin set hnihna an la a, Haryana spiker hian a pum puiah point 28 hmuin 12 a hloh a, D3 Business Player of the Match-a thlan a ni.

Set khat ve ve an lak hnuah mipui thawm a thain inkhel boruak a sosang hle a. Hunthar setter Remsangzuala’n awmze neiin ball a sem a, Lalruatfela Sailo chuan fing taka a khelh bakah Laldensanga, Zomuansanga leh Lalramnunfela’n team an tanpui tel a, set thumna leh lina tir lamah 11-6 leh 7-2-in hma an hruai.

Set tir lam leh a tawp lamah Tuichangral an chiai thin avangin tawn hriat nei Hunthar an hriam a, set hnih la zawnin team el tham tak lakah fiahna an pal tlang rualin rin hlawh an nihna an chhawm nung thei.

2019 leh 2022-ah final lut pha lovin semifinal-ah Hunthar an tla zawn a, tun season-ah team hlauhawm siam thar lehin Pro Division inelna vawi hnih awm tawhah an champion ve ve.

Season kharna leh Mizoram inelna sang berah lungthu kim theihna chi hnihin a hmuak mek a, an hlawhtling a nih chuan trophy pathum nen kum kharin a tum thum nan Pro Volleyball-ah an champion bawk ang.

Mi malin Gagandeed a langsar fal tih loh Mizo player thaten inkhairual takin Hunthar tan an khel a, Ruatfela leh Densanga’n point riat ve ve hmuin vawi khat leh vawi thum an tisual a, Zomuana’n vawi kua vaw tlain point ruk a paih.

Tuichangral rinrawl Saitea’n point 16 thawk chhuakin point 10 a hloh.

Set linaah 21-13-a hniam zawk an nih laiin a ke ding lam a tina a, lak chhuah niin Thawhtannia TNT nen an inkhelh hunah a inlan thei dawn em tih a chiang lo.

Tun season-a hneh theih loh Huntharin Inrinniah an khel leh nghal dawn a, champion lai, Durtlang North nen an inhmachhawn ang.

RESULT:
June 8, 2023 (Ningani): Hunthar bt Tuichangral (mipa)- 25-20, 21-25, 25-23, 25-20 (3-1)

D3 Business Player of the Match: Vinod Khatkar (Tuichangral)

Stats:
HUNTHAR:
Gagandeep Singh: point hmuh - 25, point hloh - 10
Laldensanga:  point hmuh - 8, point hloh - 1
Lalruatfela Sailo:  point hmuh - 8, point hloh - 3
Zomuansanga: point hmuh - 9, point hloh - 6
Lalramnunfela: point hmuh - 7, point hloh - 4
Lalnunfela:  point hmuh - 4, point hloh - 3

TUICHANGRAL:
Vinod Khatkar: point hmuh - 28, point hloh - 12
Saidingpuia Sailo: point hmuh - 16, point hloh - 10
H Lalrinmawia: point hmuh - 8, point hloh - 1
Lalhmunmawia: point hmuh - 5, point hloh - 2
Thangminlal: point hmuh - 3, point hloh - 6
Vanlalthlamuanpuia Sailo: point hmuh - 2, point hloh - 2

FIXTURE:
JUNE 9 (ZIRTAWPNI):
03:30 pm: Bungkawn v Durtlang (hmeichhia)

JUNE 10 (INRINNI):
03:30 pm: Luangmual v Bethlehem Vengthlang (hmeichhia)

08:00 pm: Durtlang North v Hunthar (mipa)