Kum li hnuah Chhinga Veng Spikers-in hnehna kawng an zawh thar leh a, Ningani Tata SK Pro Volleyball League-ah 3-1-in Tuipuiral an hneh.

R Dengthuama Indoor Stadium, Mualpuiah Chhinga Vengin Tuipuiral lakah team tha zawk an nihna chiang takin an lantir a, 25-16, 22-25, 25-20, 25-19-in an chak.

2019 final-ah Durtlang North hnehin a vawi khat nan Chhinga Veng an champion a. Covid-19 leng vanga kum hnih awl a nih hnuah nikum khan Pro Volleyball chhunzawmin, league tum li an khelhah champion lai an tlawm vek.

Season kal mekah 2022-a Durtlang North champion team player pawimawh, Lalbiakmuana an la lut a, tun tournament atan Rajasthan player tha, Javed Khan la lut bawkin champion leh tumin team thar an din.

Nikuma mang chhe tak an neih vai kiang nghalin tha takin league bul an tan a, 2019 hnua Pro Volleyball-a an chak hmasak berah Biakmuana’n point 18 hmuin tum nga chiah a tisual a, fel fai takin a khel.

Spikers tan a inlan hmasak berah Javed chuan point 22 hlawh mah se 12 a paih a, K Lalfakawma’n awmze neiin a khel a, vawi 14 vaw tlain tum nga a tisual a ni.

Kai thar, Tuipuiralin a tum ber pakhat, Pro Volleyball khel thei mah se inkhel boruak leh kawng hrang hrangah an la mikhual a; chutih laiin set khatna an hloh hnuah Delhi atanga an lak luh, Anurag Rawat chuan team tan beiseina a siamsak.

Mahse, Mizo player khaikhinin tawn hriat leh theihna hrang hrangah Chhinga Veng an khan lo va. Set khat ve ve an lak hnuah Tuipuiralin harsatna tawk zuiin Anurag a mal tan nasa a, lehlam an bei let zo tawh lo.

Mizorama a inkhelh vawi khatnaah team a chakpui lo na a, mittlung takin Anurag a inlar a, point 35 hmuin 20 a hloh a, D3 Business Player of the Match lawmman a dawng.

A tirin Tuipuiralin Karnataka player, Sujith Kumar an be fel hman a, chawlh a neih theih loh avangin an la chhuak thei ta lo. Chawpchilh takin Anurag an dawr a, a khelh dan atangin an tisual lo hle tih a lang a, an team atanga amah thlawp thei ber, Laltlanchhuaha’n point li a hmuh chanve a hloh a ni.

Thawhlehni zanah Chhinga Vengin khelh hnih chak zawn tumin Durtlang North an hmachhawn dawn a, a tuk zanah Tuipuiralin insiam that mamawh chungin Mizo hlang, TNT an khelhpui ve leh ang.

RESULT:
June 8, 2023 (Ningani): Chhinga Veng Spikers bt Tuipuiral (mipa)- 25-16, 22-25, 25-20, 25-19 (3-1)

D3 Business Player of the Match: Anurag Rawat (Tuipuiral)

Stats:
CHHINGA VENG:
Javed Khan: point hmuh - 22, point hloh - 12
Lalbiakmuana: point hmuh - 18, point hloh - 5
K Lalfakawma: point hmuh - 14, point hloh - 5
PC Lallianmawia: point hmuh - 6, point hloh - 3
Joseph Lalbiaksanga: point hmuh - 3, point hloh - 1
Lalnunfela: point hmuh - 4, point hloh - 3

TUIPUIRAL:
Anurag Rawat: point hmuh - 35, point hloh - 20
Laltlanchhuaha: point hmuh - 4, point hloh - 2
PC Lalnunmawia: point hmuh - 6, point hloh - 6
Michael Lalfinga: point hmuh - 6, point hloh - 6
Vanrammawia: point hmuh - 3, point hloh - 3

FIXTURE:
JUNE 9 (ZIRTAWPNI):
03:30 pm: Bungkawn v Durtlang (hmeichhia)

JUNE 10 (INRINNI):
03:30 pm: Luangmual v Bethlehem Vengthlang (hmeichhia)
08:00 pm: Durtlang North v Hunthar (mipa)