PSG leh Argentine coach Pochettino chuan an inremna thuthlung chu chhut chah tawh mai an remti a, thla 18 zet PSG a enkawl hnuah Pochettino chuan Ligue 1 team chu a chhuahsan dawn ta a, club-in an duh leh beisei ber Champions League nomawi a chawipui theih lo chu a chhuah tur chhan niin an sawi.  

Athletic sawi danin, PSG aiawh te leh Mauricio Pochettino te hian, kar hmasa khan inkawmna hun neiin in chhawr chhunzawm tawh rih loh hi an tithlu niin an sawi. PSG hi season liam ta khan Ligue 1-ah an champion a, mahse Champions League, Round of 16-ah Real Madrid an paltlang zo lo thung. Hei vang hian PSG lam chuan Mauricio Pochettino-a chu Paris Saint-Germain enkawl chhunzawm tawh lo mai turin an ti niawm tak a ni.  
 
Mauricio Pochettino hian PSG lamah nakum 2023 nipui thleng contract a la nei a, chuti chungin club a chhuahsan tawh dawn bawk si a, an inremna siam dan erawh puanzar a ni rih lo thung. Hetih lai mek hian sporting director Leonardo pawhin club hi a chhuahsan dawn a, club thu neitu lamin staff atanga indin thar leh phawt an tum a nih hmel.  

Tunge PSG coach ni ta ang?

PSG coach thar tur chungchang hi media hrang hrangin an tuipui hle a, a tam zawk chuan season thar atangin Zinedine Zidane chuan Paris Saint-Germain hi a enkawl dawn niin an sawi. He thu hi an mahni lam chuan an la sawi lang thung. Athletic sawi dan chuan Nice coach Christopher Galtier chu PSG enkawl tura an duh thlan niin an sawi ve thung a, report thenkhat chuan Roma tactician Jose Mourinho chu Pochettino thlak tura rinkai ber niin an sawi ve bawk.