Aizawl May 29, 2023 : MNF Thalai Headquarters ten Block an tlawh naah hian MNYF President Dr.L.Thangmawia chuan, Eptu pary ten Chief minister Zoramthanga an puh dan ang em em a tha lo nise Pathian-in a Chief Minister tir a rin loh thu a sawi.

Dr.L.Thangmawia chuan, "Kan unau raltlante tan Chief minister hi nu leh pa ni tura Pathian remruat a ni. Hnam thilah Chief Minister Pu Zoramthanga hi an tlan chhe ngai lo. MNF hian Zofa te tan international politics kan khel mek a, Zofa te rorelna khat hnuaia an awm theih nan kan thawk reng a ni. Hun harsaah Pathianin min sawrkar tira, Chief Minister Pu Zoramthanga avangin kan kal tawk tawk a ni." a ti.

MNF Thalai Headquarter-in Aizawl West III Block MNYF leh Aizawl North I Block MNYF an tlawhnaah MNF Thalai Preisident Dr L. Thangmawia chuan, "Tun inthlan lo awm turah kan sawrkar leh ngei ang, MNF kan sawrkar lo a nih pawhin Congress tho hi Mizoramah an sawrkar ang.  MNF hi Mizo hnam tan kan kal avang leh kan 'goal' a dik avangin kum 60 kan kal tling thei a ni. ZPM tan sawrkar ngaihna a la awm lo. ZPM hian tun thlengin an kal phung thar an sawi fiah thei lova. Kalphung thar an la thup a, kal phung pangngaiin an la kal. Tuna ZPM MLA zawng zawng awmdan hi kalphung pangngai vek a ni. Inthlan a hnai tulh tulh anga, an buai tulh tulh ang, ZPM hian an hmaikawr hi a in hlip chho zo vek tawh, a ti.

Thangmawia chuan, "Kan ram leh hnam tan ke kan pen tur a ni. Chumi tur chuan theih tawp i chhuah ang u. Ram leh hnam dah hmasa hram hram ang, chumi hnuah chuan malsawmna a awm a ni, a ti bawk.