FIFA World Cup 2022 chu thla 4 chauhin a dang tawh a, fans eng emaw zat chu an phur tawh viau a, mahse, Qatar hi inneih hmaa sex hman phal lohna ram niin dan khauh tak an nei a, One-night stands vang chauh pawhin kum 7 thleng jail a tan theih dawn.

FIFA World Cup 2022 neihna tur hmun Qatar hi Muslim ram a nih angin, tun atangin dan kenkawh dan tur chungchangah sawisep leh invau lawkna a tam tawh ang reng hle a. World cup thleng thin ram dangte anglo takin fans lam tan a zalen dawn lo tih chu a hriat sa reng mai. Qatar hi neih inang te inkawp phal lohna ram a nih bakah dan chi hrang hrang a tam hle a, khawvel hmun hrang hrang ram zalen tak tak atanga FIFA World Cup en tura fuan khawm te tan pawh harsatna tam tak a awm ngei ang le.

FIFA World Cup 2022, Qatar-a neih chhung hian zan lamah pawh fans te an chep dawn hle a, one-night stand vang ringawt pawhin kum 7 thleng jail tan theih a nih dawn vangin, sex hman kawnga insum hram hram emaw mipui hmuh tura ual-au taka khawsak loh a him ber mai thei. A thlengtu branch lam hian sex hman chungchangah dan khauh tak an nei a, khawthlang ramah inngaizawngte chen dun thlenga an phal sak laiin Qatar lamah erawh nupa tan lo nupa nun hman a rem lo bur a, an ram dan zawm lo tute chungah khawngaihna lartir an tum vak lo bawk.

Police lam pawhin, FIFA World Cup 2022 chhung hian an ram chhung dan hrang hrangte chu khauh taka kenkawh an tum dawn a, an officer pakhat chuan nupa nilova nupa nun hman leh zan lam a zu in leh party vel chu an phal dawn loh thu sawiin,“Sex hi chu nupa kar chauha thleng tur a ni. Tournament lo awm turah hian one-night stand leh party tih vel phal a ni dawn lo. Jail run thim pan an duh loh chuan tu pawhin kan thu hi an zawm a tha ang. Kan ramin kan vawi khat thlenna tur World Cup-ah hian kan dan pangai angin sex hman khap a ni dawn a, chumi dan zawm tur chuan fans lam pawh an inpuahchah a ngai dawn a ni. Hmun tam takah chuan inkhelh zawha zu in leh party vel hi tihdan phungah an nei a, kan ramah chuan kan remti ve lo," tiin police officer pakhat chuan Daily Star a hrilh. 

November 22 atanga tan tur ram 32 te inelna tur FIFA World Cup 2022 hian ni 27 chhung a awh dawn a, he huna tel tur ram tam zawk hi Kristian ram niin tournament hi Kristian te hunpui Christmas hma kar December 18-ah a zo dawn chauh a, Kristian te hunpui leh mi tin sahawk hun lai Christmas dawn boruak a nih vangin boruak hrang hrang chu a tam khawp ang.

World Cup-ah hian khawvel player thiam ber ber Cristiano Ronaldo, Lionel Messi, Robert Lewandowski leh Luis Suarez te pawh an inlan dawn a, an hun hnuhnung a nih dawn tawh hlawm avangin an khel en chak hrim hrim pawh hi mi tam tak an fuan khawm tur a ngaih a ni.