Aizawl August 5, 2022 : Zoram Peoples Movement Thalai chuan Covid-19 hluar laia Quarantine Centre leh Covid Care Centre-a ei leh in man vawiin thleng Mizoram sawrkarin a la bat Cheng 66,37,385 leh Covid volunteer 348 te hlawh cheng 29,93,000 a la bat te chu pe thuai turin sawrkar an ti.

Nimina Chanchinthar thehdarhtute an hmachhawn naah ZPM Thalai Vice President Dr. C. Lalrammawia chuan, "Assembly zawhna leh chhanna atanga a lan danin Mizoram sawrkar hian State budget atangin lockdown lai khan lockdown avanga tam tuarte tan tan puina engmah a pe lo, tih a chhan a ni. Hetihlai hian CM relief fund for Covid-19 ah Kohhran, tlawmngai pawl leh mimal ten pawisa tam tak an chhunglut a. Hetiang zat leiba hi sawrkar hian nei turah kan ngai lo. CM relief fund for Covid-19 a tanpuina lutte kha khawiah nge a awm? tih hi sawrkar kan zawt," a ti.

ZPM tha lai chuan, "MNF sawrkar tirh atanga hrilen lai leh March, 2021 chhung khan mau chinna atan cheng nuai 272,60,431 an seng a, hri len lai tho khan Kamrula hnenah Airport tih chang tlun an cheng nuai 7051 man hna a pe bawk a ni. Hei hian an ngaisak zawng leh duhnaah chuan MNF sawrkar hian sum an ui lo hle tih a lang a ni," an ti.

Covid-19 pawhin zia-awm lam a pan tawh a, sawrkarin leiba tam tham tak a a la nei chu ZPM Thalai te chuan an hriatthiam loh thu leh pawi an tih thu an sawi a, a dawng tur te hnenah pe thuai turin sawrkar an ngen a ni.