November 16; 2022; Niminpiah, Thawhtanni tlai a Hnahthial district, Maudarh khua a ABCI Infrastructure Pvt. Ltd. te lunglakna hmun quarry chim a thi mi 12 zing a mi 10 te ruang chu he thu ziahlai thleng hian lak chhuah tawh a ni a, ruang 2 zawn hna ngawrh taka thawh chhunzawm zel a ni.

Hnahthial DC R. Lalremsiama tarlan danin ruang 8 lak chhuah an nih hnuah, nizan dar 9:45 khan ruang dang 2, Shofiqul Islam (26) s/o Mazumdhar Ali, Takimari, Jaleswar Bill, Goalpara, Assam leh Kahamrai (49) s/o Subreto L, Zawlpui, Lunglei district te ruang chu lakchhuah leh an ni a, ruang 2 te hi Hnahthial district hospital ah postmortem tur a lak nghal an ni.

Chhiatna thlen hnu a ruang lak chhuah hmasak ber chu nizan hmasa dar 9:40 khan lak chhuah a ni a, ruang lak chhuah hnuhnung ber chu nizan dar 9:45 a lak chhuah te hi an ni. Tun thleng zawn mek te hi Jahidur Islam c/o Samsul Hoque, Assam lam mi leh Ajoy Chakma s/o Rangachand Chakma, Khojaisuri, Lunglei district te an ni.

Chhiatna thleng chungchang hi Disaster Management & Rehabilitation Department chuan Mizoram sorkarah thil thlen dan chungchang report a thehlut tawh a. He chhiatna rapthlak hi November ni 14, 2022 chawhnu dar 2:40 khan a thleng a. Lung lakna quarry, ABCI Infrastructure Pvt. Ltd. ta a ni. 

Report thehluh a nih thleng hian duty roster atanga a lan danin quarry chimin a chhilh zat hi mi 12 an ni a, leiminin a chhilh mi 4 te hi ABCI company hnuaia thawk an ni a, mi 8 hi ABCI sub-contractor hnuaia inhlawh an ni thung.

He chhiatna rapthlak tak thleng hi Mizoram sorkar chuan pawi a ti tak meuh a. Ruang zawn hna hi thawh mek a ni a, hmuh kim an nih hma chu kalpui tur a ni.