England mai bakah khawvelin Queen Elizabeth II a sun mek a, vui liam a nih hun tur erawh hriat a la ni lo. London-a Buckingham Palace tualah mi tam takin sunna pangpar an dah a, kawthlerah mi tam tak an pungkhawm bawk. 

Queen Elizabeth II lal thuthleng hi King Charles III chuan a luah dawn a, vawiin hian lal chungkaw aiawhin thu a sawi ang. Prince of Wales hlui King Charles III chuan, "Kei leh ka chhungte tan chuan hun hreawm ber a ni," tiin a sawi.

England lalnu Queen Elizabeth II thihna hian khawvel a dengchhuak hneh hle a, ram hruaitu lawk tak takte leh milar tam takin amah an uina thu an sawi chhuak nasa hle. British singer ropui 'Sir' title hial an pek Sir Elton John leh Sir Paul McCartney te pawhin Queen Elizabeth II hi an ui tak zet tih an tarlang. 

British mipuite chuan an mi ngainat em em Queen Elizabeth II hi an sun mek a, music, film, sport leh television huangah pawh a chanchin hian hmun lailum a luah mek. Sir Paul McCartney chuan, "Pathianin Queen Elizabeth II malsawm rawh se, thlamuang takin a chawl ta," tiin a tarlang. 

Ram hruaitu zingah India Prime Minister Narendra Modi pawh England lal uina thu sawi chhauktu zingah a tel a, Russia President Vladimir Putin meuh pawh tawng chhuakin a uina thu a sawi chhuak.