Aizawl July 20, 2022 : MPCC Executive meeting chuan Mizoram Sawrkara Finance Commissioner-in sum leh pai lama harsatna a zualkai tur thu a sawi, nitin chanchinbua lo lang chu ngun taka a zir chianin Mizoram sum leh pai dinhmun hian hniam lam a pan zel a, râlkhel dâr vuak a ngai ta hialah kan ngai, an ti.

MPCC chuan, "Hetianga sum leh pai lama harsatna namen lo kan tawh chhan hi eng dang vang ni lovin, Zoramthanga kaihhruai MNF Sawrkarin a tlaran zawnga ram an hruai vang a ni tih hi Congress Party hmuh dan a ni. Congress Sawrkar, Lal Thanhawla kaihhruaiin inrenchem taka Mizoram sum leh pai dinhmun a lo siam that tawh sa, kum 4 pawh a ral hmaa MNF sawrkar hian dinhmun chhe takah a dah leh ta mai hi a pawi kan ti takzet a ni," an ti

MNF sawrkar chu a tlaran zawnga che-ah puhin, "Zoramthanga kaihhruai MNF Sawrkar hian, hmuh lêt  lehna tur awm miah lo thilah sum tam tak tak a hman thin avangin Mizoram leiba pawh nasa takin a pung a. Hei hi siam țhat thuai a nih loh chuan Mizoram hi "Leiba thang"(Debt trap) ah a tâng ang a, mipuiten kan tuar nasa hle dawn a ni," an ti.

Hetiang hi Mizoram sum leh pai dinhmun a nih laia Chief Minister leh Finance Minister ni bawk, Zoramthanga'n ngawih a la chuh tlat hi a mawhphurhna a lâk thutak lohzia tichiangtuah Congress Party chuan an ngaih thu an sawi. "Finance Commissioner thusawi hi a dik a nih chuan MNF Sawrkar hi siamțhat hna thawk tura a chet a hun kan ti a ni. Hetih rual hian mipuiten sawrkar sum  leh pai dinhmun diktak kan hriat theih nan "White Paper" tichhuak vat turin Mizoram Sawrkar hi kan phût tlat a ni," an ti bawk.

MPCC Executive Committee meeting hi vawiin khan Lal Thanhawla Auditorium-ah neih a ni a, meeting hi Lalsawta, President-in a kaihruai. MPCC hruaitute term, July 24, 2022 a tawp ta chu kum 2023 General Election thleng pawhsei nise an ti a ni.