Aizawl: I&PR Minister Lalruatkima chuan, "State dang atanga zohnahthlak raltlante hi kan unaute an ni a, duat taka kan enkawl leh kan chhawmdawl zel a tul a ni," a ti.

Chalfilh Group YMA in Zirtawpni kaltaa an kum 25-na (Silver Jubilee) lawmna Sawleng Community Hall-a neih a hmanpuina ah he thu hi sawiin Lalruatkima chuan, "YMA din chhan ber ‘Tanpui ngaite tanpui’ a nih angin midang tana tangkai, entawntlak ni tur leh tanpuitu ni thei tura inzirtir uar a ngai a. YMA chu pawl bik nei lo, political party leh kohhran hrang hrangte fawmkhawmtu ber a ni a, Mizo hnam tana tangkai leh chhuanawm tak a ni," a ti. Khuallian chuan Mizoram chu pi leh puten Mizote chenna atana an lo sual chhuah ram a nih angin a venhim hna chu keimahni kutah a innghah thu sawiin state dang nena ramri buaina kan neih chang pawha kan tanrual tlan chu pawimawh a tih thu a sawi a. Ram dinchhuahna, thanna leh hnam ral lo turin mihring tam kawngah pawh tan lak a ngai hle a ni, a ti.

Central YMA President R. Lalngheta pawhin thu sawiin eiruk, hlemhletna leh ruihtheih thilah Mizo te kan fihlim a hun tawh hle a, YMA Member ten mahni chhungkua leh khawtlang theuhah bul tan a ngai a ni, a ti.

Chalfilh Group YMA hi kum 1997 ah din niin tunah hian YMA Branch 20 an awm mek a ni.