Aizawl: Myanmar raltlante tana NSUI (Mizoram)-ten Congress Party hminga vehbur an khawn te chu nimin khan Myanmar Refugee Relief Committee hnena hlanna hun Lalrindika Ralte, MLA hovin Congress Bhavan Golden Hall-ah an hmang.           

Tanpuina hlantu Lalrindika Ralte, MLA chuan thu sawiin, “Hetiang hun hman hi thil duhawm lo ni mah se, kan tawn tawh thil a nih avangin luangchhuak thei zawk a kan tang hi a lawmawmin a vanneihthlak ka ti a. Kan innghahna hi mihringah ni loin Pathianah nise ka duh a ni. Mahni hma sial leh mi dik loten dinhmun tha leh ram hruai hna an thawhna hi ram nuam a nih ka ring ngai lo va, ram vanduai tak an nih ka ring a ni. Kum zabi 21-na kan thleng tawh a, thuneihna thlakhlelh avang leh mahni hmasialna avanga mahni mihringpuite pawhin tuar mah se, pawi ti lo khawp a thuneihna thlahlel an la awm hi a vanduaithlak ka ti a. Chutiang hmuna kan unau, kan Mizopuite a tuartu an han ni hi a pawi ka ti hle a, ram ralmuang in neih leh vat theih hi ka duh a ni. Politics pawimawhzia hi vawiina kan hun hman atang pawh hian a lang chiang hle a ni,” a ti. 

Lalrindika Ralte, MLA chuan, "Kan thinlung hi Pathianin min siam chhan ang ngeiin mi dangte tana luangchhuak tur a kan inbuatsaih a tul a, hamthaṭna tur kawng tam takah kei tih aiin nang tih hi kan sawi tam a ṭul awm e. Kan President-in refugee status pe turin theihtawp a chhuah a, mahse chhanna mumal a la awm thei lote hi a pawi ka ti hle a ni. Mizoram mipui hian in harsatna hi kan hriatpuiin kan tawrh pui che u a, mimal ang leh MPCC ang pawh in min mamawhna apianga che tur in kan in buatsaih a ni tih min hriatsak ula, in tan kan awm reng a ni tih in hre reng dawn nia,” a ti bawk.

He huna report petu NSUI President RB Lalmalsawma chuan, “Congress party hi kan President Pu Lal Thanhawla kaihhruaina hnuai a Mizorama remna leh muanna thlentu Party kan ni a. Congress party hi rambuai hrehawmzia hretu leh remna leh muanna duhtu kan nih avangin kan unaute harsatna tawh hi kan hrethiam em em a, chung avang chuan kan unaute tawrhna hi kan theih anga chhawmdawl ve ni se kan ti a, a theih ang angin party chhungah vehbur kan khawn ta a ni,” a ti. 

Myanmar Refugee Relief Committee President  Vanlalchhana pawhin thu sawiin, “Khatia Myanmar boruak a chhiat a, Mizoram pan an ngaih hnu khan NGO For Myanmar din a ni a,  Aizawl District chauh a huam avangin a zim deuh kan ti a, Myanmar Refugee Relief Committee din ang u kan han ti leh a. Ram dang atang leh Mizoram a\anga kan sum hmuhte chu hmun hrang hranga relief camp-te leh a petute inkar pein, a petu leh dawngtute inkara bridge (Lei) ah kan lo ṭang ve a ni. Congress party hian he lai Mizo mai ni lo, ram dang dang a Mizote a hmangaih zia hretu kan ni a, kan thlamuanpui tak zet a ni,” a ti.District hrang hranga raltlan awm tawh dan chu hetiang hi a ni :  

Myanmar raltlante tanpui nana MPCC thilpek hi Buhfai  Bag 30, thawmhnaw eng emaw zat, medical equipment - Rs 30,000/- man, pawisa fai - Rs. 20,000/- leh bungraw phurhna tur motor hmanna tur Rs. 30,000/- a ni.

Myanmar Refugee Relief Committee report danin Myanmar atang hian Mizoramah mi 13,500 chuang raltlan an awm tawh a ni.

District hrang hranga raltlan awm tawh dan chu hetiang hi a ni :  

Aizawl District      - 3633
Lunglei District     - 367
Champhai District     - 4156
Lawngtlai District     - 1297
Siaha District     - 1633
Hnahthial District     - 978
Serchhip District     - 343
Kolasib District     - 36
Saitual District     - 112
Khawzawl District     - 28
TOTAL     - 13583
(NB - Myanmar Refugee Relief Committee chuan tunah hian mi 1000 atanga 2500 vel Mizoramah raltlan la awm meka an ngaih thu an sawi)