Aizawl June 1, 2023 : Mizoram Rajya Sabha MP K. Vanlalvena chuan Champhai District-a raltlante a tlawh naah MNF sawrkarin raltlante a tanpui chhan chu vote hmuh belh beisei vang a ni loh thu a sawi a, inunauna vang zawk a nih thu a sawi.

K. Vena hian Vaphai, Farkawn leh Zawlsei te tlawhin Myanmar raltlante awmna leh an dinhmun te a en a. Heng khuaa te hian thu sawiin "Kan unau ten tanpui an mamawh tih kan hmu a kan tan pui mai zawk a ni. Chu chu Mizo Kristian te nunphunga bet a ni" a ti. K. Vena chuan khawtlang hruaitute leh NGO hruaitute bakah mipui ten raltlante hmangaih taka an lo tuam hlawm thin chu Pathian duhzawng a ni ngei ang tih a rin thu a sawi a ni.

Vaphai ah hian khawtlangin an enkawl, Vaphai High School leh Higher Scondary School, atanga class 10 leh class 12 exam ten an passed kim vek lawmna programme a hman pui a. K. Vena chuan zirlaite chu hmalam huna hlawhtlinna nei turin mi awmthei fa nih leh mirethei fa nihin danglamna a nei lo, a ti. K. Vena chuan, "Rilru mumal tak nei chunga tumruhna leh Pathian tihna nen chuan hlawhtlinna tur hi tumahin an dal thei lo," tiin, zirlaite chu tumruhna nena lehkha zir turin a fuih.

Rajya Sabha MP hian Vangchhia khaw daia Kawtchhuah ropui a tlawh nghal bawk a. He hmuna lungphun leh pipute sulhnu chi te chu, "Kan pi pute sulhnu ngei a ni tih rinhlelh tur a awm lo", a ti a. Mi thenkhatin Hindu te sulhnu niawm taka an sawi thin hi thil hriat chian loh vang a nih a rinthu leh India ram hmun hrang hranga hmanlai Hindu te lungphun leh Vangchhia khaw daia lungphun te hian inlaichinna an neih a rinawm loh, a ti.