Aizawl: Health Minister Dr. R.Lalthangliana chuan, “Ram changkang a piangah bank an hmang tangkai a, bank awm lohnaah development a awm thei tak tak lo,” a ti.

Health Minister hian Zirtawpni khan Mizoram Cooperative Apex Bank Ltd. Branch thar Hnahthial a hawnnaah he thu hi sawiin, “District tihchangtlun chhoh zel niin department hrang hrang an inbun fel chho zel dawn a, chutihlaia Apex bank branch thar hawn a ni hi a fuh khawpin ka hria. Hlawhtling turin tih tak takna kan neih a, kan thil tumah kan chian a ngai a ni. Eizawnna ngelnghet kan neih theihna turin Bank an pawimawh a, sawrkar flagship programme SEDP kan kalpui tak tak hunah phei chuan Bank pawimawhna hi a nasa tulh tulh dawn a ni,” a ti bawk.

Mizoram Cooperative Apex Bank Chairman T.Lalmuanpuii pawhin thu sawiin, “Hnahthiala Branch thar hawng tur hian kan vei rei hle a. Zoram mipui leh thalai ten support min pe thain kan phur hle a, loan pending kan nei ngai lova kan pek theih ang chin chu a hun takah kan pe thin a ni,” Apex Bank chu chhawr tangkai turin mipuite a sawm bawk.

Apex Bank Hnahthialah hian mi 200 velin account an hawng tawh a, deposit hi Rs. Nuai 60 vel a ni.