Aizawl September 2, 2022: Dampa bial fanga fehchhuak mek ZPM  Leader Lalduhoma chuan MNF sawrkar chu a lu berin na zir loh avangin an hun a her liam mek a ti a, India ram pumah Congress an tla chhia tiin ZPM chu mipui ber sei ber ni sawiin ram hmangahtute an hnena kal turin a sawm. 

Vantlang Inkhawm neihna hmuna thusawitu ZPM Leader chuan, “ZPM in hmun hrang hrangah hma a sawn zel a, mi leh sa kan neih ngai reng reng lohna hmunah te unit dinin, mi leh sa engemawzat kan nei ta zel a, hei hi kan theihna leh chakna vang ni lovin Pathian hnathawh a ni. Kan hma hruaitu hi a awm a, rinhlelh rual a ni lo. Sawrkar siam tura mipui ten an beisei ber chu ZPM kan ni a, India ram pumah Congress an tla chhia a. MNF lah vai smuggler ho phenah an hotu pa ber Chief Minister a awm niin mipuiin an ngai a, candidate tha tak tak rawn nei leh mah se a lu berin a zir loh avangin an tla dawn, an hun a herliam mek, ram hmangaihtute ZPM-ah lo kal rawh u. Pathian chakna nena kan ram siamtha turin thawhhopuiah kan sawm che u a ni,” a ti.

Duhoma chuan, “Mizoram hi thlai that duhna ram a ni a. Awmze nei zawka thlai chin a nih theih nan ZPM chuan ruahmanna fel tak siamin, hmanni lawkah ‘policy’ kan tlangzarh tawh a. Pathian leh mipui zarah ZPM-in sawrkarna a siam chuan thlaite hi rate mumal tak siamin, a tul ang zelin hmalak a ni ang a, ram pawna thawnchhuah leh ram chhunga hralh dan tur te a tahtawlin sawrkarin a ruahman ang a, a tul dan ang zelin minimum support price a pe dawn bawk a ni. Tih tak taka titute chu an bânah kai chungin hma kan lâk pui dawn a. Kuthnathawktute tan kan thil thar chhuah te a hralhnaah kan buai a ngai tawh dawn lo va, budget-ah chumi pual chuan pawisa kan dah dawn a ni," a ti bawk.

ZPM Leader chuan, “Tuna kan ram sum leh pai dinhmun kan thlirin sum enkawl chungchangah kan sawrkar hrawn mek hi a hlawhchham tih a chiang a. Mizoram sawrkar sum dinhmun a tha lo a, state khat sawrkar ve riang ruangin cheng nuai 20 chauh neih chang te an nei hial a ni. Sawrkar hnathawkte hlawh pawh a hunah a pe hlei thei lova, tunah hian kan sum dinhmun a buai em em a, engvangin nge hetiang dinhmunah kan kan din tak mai tih kan ngaihtuah a ngai a ni," a ti bawk.