Aizawl : September 26,2022 (Thawhtanni) hian MPCC chuan Golden Hall, Congress Bhavan-ah ‘Siamthar Lehna Crusade’ thawh thumna hun hman a ni a, he huna Speaker atana an hman Rev. Vanlalzuata chuan, ram hruaituten an rilruah a ram leh a felna an dah hmasak hunah Pathian malsawmna kan dawng ang, a ti.

Rev. Vanlalzuata chuan, Lal Isuan kan ei pawhin kan in pawhin kan thiltih apiang Pathian ropuina tura ti tur leh chumi tur chuan a ram leh a felna zawn hmasak a pawimawh a ti. Pathian dah hmasak ber chu thiltih makmawh a ni, a ti a, Pathian dah hmasa lova a thilpek thlakhlelh hmasak chu a pawi thin, a ti. 

Speaker hian Fiji ram dinchhuah dan sawiin, Pathian mi President-ah an thlan hnuah an ramin malsawmna a dawn dan te bakah Abraham Lincoln-an politics a khelh chhan, an ram mipui zawng zawng zalenna atana a beih dan te, Mahatma Gandhi politics khel dan danglam tak, nihna pawh duh chuang lo a nih thu te, India ram mipui mittui hruk hul kha a politics a ni tawp a, Lal Isua duhzawng politics a khel a, ramin malsawmna a dawn phah a ni, tiin, "Ram rorelna tha leh dik nei turin Pathian dah hmasak a pawimawh, ram hruaituten an rilruah a ram leh a felna an dah hmasak hunah hunah Pathian malsawmna kan dawng ang," a ti bawk.

Zuata chuan, Party hrang hrangten kan ram dinhmun dik tak ngaihtuah a hun. Congress Party chauh ni lo, Party hrang hrangten Lalpa rawn lova kan ta emaw ti a mahni nawmchenna leh induhsak tawnna ringawt mai ngaihtuah kan nih chuan Pathian kut kan la tuar dawn. Chu chu hlauhawm lutuk, fimkhur angai takzet tawh tih sawiin, Nehemia hunlaiin mipui an mangang a, an lalte lah chuan mipui chungah leh an ran te chungah thuneih an tum, tih sawiin, ram mipui te chuan Pathianin ram a pekah ngei bawih ang maiin an in ngai a, an rum tlawk tlawk mai a ni. Kan ram Politics a kal sual vaih chuan Mizo leh Mizo hi Bawihah kan inchhawr mai ang. A hlauhawm lutuk. Politiciante hian Pathian i tih ang u.