Aizawl : MPCC chuan Vawiin 12.09.2022 (Thawhtanni) khan Golden Hall, Congress Bhavan-ah Pathian ‘Siamthar lehna Crusade’ hun an hmanga a, Rev. Vanlalzuata chu Speaker atan hman a ni a, speaker hian ram leh hnam dinchhuah nan rinawmna chu thil pawimawh tak a nih thu a sawi a, Rinawm lohna in Kohhran, Political party leh mipui te min ti na thin, a ti.

Rev Vanlalzuata chuan, "Sam 37:3-ah, Lalpa chu ring la, thil tha ti rawh; He ramah hian awm la, rinawmna um zel rawh....” tih kan hmu, khawvela natna tam ber chu rinawm lo natna, mi rinawm lo te avangin mi tam tak an na a, mi nunah kan nâ kan na thin. Rinawm lohna in kan ram, Kohhran, Political party leh mipui te min ti na thin. Mi rinawm lo chuan thil tha ti mah se, rin a hlawh tak tak thei lo," a ti. 

Mizo hnam hi rinawm lo kan ni ngai lo, tiin Zuata chuan, "Buh seng laiin thenawmte buh vui an lo lama lo uai lut pawh thenawmte lo lamah an dahlet thlap thin, Rinawmna vanga kawngka pawh kalh ngai lo hnam kan ni. Ruk tur nei mah se, ruk duhna thinlung an pu ngai lo. Sipai inthununnaah rinawmna an ngai pawimawh a, a tul a nih chuan mahni chhungkua, thisen zawmpui te pawh ram tana an rinawmna vangin an nunna lak a ngai thin," a ti. 

Rev. Zuata chuan, "Kum 1946 atangin Mizoten Politics kan khel a, Rinawm lohna a rawn inlar tan, tih lehkhabu ziaktuten an sawi, Tunhmaa awm ngai lo Corruption te sawi sawi a lo ngai ta. Suala piang a, suala pai kan ni. Mahse Pathian zarah kan rinawm thei. Keimahah rinawmna a awm lo, kan rinawm leh awm lohah Pathian kan rin dan a lang chhuak a, Pathian kan hriat dan ang zelin kan nung thin. Rinawmna chu hmuh theiha rinawmna a ni. Rinawmna leh Thil tih chu a inkawp tlat a ni," a ti. 

"Duhthusamin tumah kan nung thei lo. Mahse nitin kan thi ang a, a hma aia tha zawkin nun thar kan nei ang. Chu chu Siam thar lehna Crusade kan tih chhan a ni. Sap ramah inkhawm an bansan, inkhawm tur an hmu zo lo, keini pawh an tan kan tawngtai, mahse an rinawm em em si. Keini chu kan inkhawm nasa em em, mahse rinawm lohna vangin kan buai em em thung si. Inkhawm leh khawm loh hi a chhanna tur a ni lo. A chhanna chu Inkhawm bawk ila rinawm bawk ila, a fel mai," a ti bawk.  

Zuata chuan, "He ramah hian awm i la, Rinawmna hi a bul berah vawng nghet i la, Zoram thar, he ram hi kan tu leh fate tana chenna tlakah, ram nuamah siam a tul. Great Wall of China chhunga hmelma te an luhruk theihna chu an fate nunah rinawmna an tuh lo a, pawisa hmanga thamna an do zawh loh vang a ni. Kan ram siamthatna bulpui ber chu kan fate nunah rinawmna kan tuh a, eng pawl ah pawh, eng Kohhranah pawh, sumdawnna leh office ah pawh, khawi hmunah pawh awm i la, Rinawmna um zel chu ram leh hnam dinchhuahna a ni," a ti.