DOWNLOAD OUR APP

Read latest news on your phone
app-store

Ram nuam tak chu!

Dec 12, 2021

Ram nuam tak chu!

Lalchhamdama Colney-

Mizoram pawh hi ram nuam tak a ni,” kan ti thin. Nia, sik leh sa a nuam a, Kristian kan ni a, a mi chengte kan inlungrual bawk a. Myanmar ramte han thlir ila, tunah tak phei chuan an awhawm lo hle. Chutiang bawkin Bangladesh, Africa ramte an rethei a, harsatna, hrisel lohna chi hrang hrangten a tlakbuak thin a ni. Europe ramte han thlir leh ta ila, an intodelh a, changkang em em a, mi dangte mamawh em em lovin an awm a, an thawhrim rah sengin nuam takin an awm a ni. Khawvelah hian khawi ram nge nuam ber ang aw, a mi cheng azirte pawh a ni thei ang. Mi chi hrang hrang kan ni a, heta miten nuam leh tha an tih kha kan lo ti ve kher lo mai thei a, chutiang bawkin hrehawm an tih kha kan lo ti ve lo thei bawk a. Ram nuam kan han sawina tlangpuiah hi chuan hmun mawi leh tha tak tak nei, building ropui leh lian tak tak awmna, fai leh changkang site an ni thin. Nia,a dik chiah a, hemi phenah hian thil inphum ru tam tak a awm bawk a, chungte chu vawiinah han sawi lan tum ila, kan thusawi tum laimu ber pawh a nih hmel.    

Kan dinhmun: Mizote chu buh ei hnam kan ni a; tin, a hmehah thlai leh thil chi dangte kan ei tel bawk thin. Kan hriat theuh angin buh hi thla thum daih vel bak kan thar lo, a nih chuan thla kaw dang ei chu kan chawk luh tihna a ni. Lak luh tur awm ta lo thut se chaw kan nghei dawn tihna chu a ni der mai. Chutiang bawkin tel, gas, alu, etc. kan lak luh chawp vek a ni. Thil siamna factory, industry, etc. lian tham eng mah kan la nei lo bawk, hei vang hian sawrkar pawhin sum hmuhna tur tih tham eng mah a nei lo, kan sawrkar pawh pachhe tak a ni. Tunah hian tui tam laiin kawlphetha hi kan thar ve nual a, Mizoramin a a mamawh zat hi MW 90/100 vel bawr a ni a, kan thar zat hi MW50 vel bawr (Tui tam laiin) a ni tlangpui thin. Hetiang hi kan dinhmun a ni a, MW50 vel bawr chu ram pawn atanga kan lak luh a lo ni a, tawp ta thut se, Mizoram mipui tam zawkte chuan mawmbhati kan chhit leh mai a ngai dawn a ni. Heng lo pawh hi sawi tur dang a la awm nual thei ang; mahse, duhtawk hrih mai ila. Kan dinhmun ber ni ta a lang chu state intodelh lo, rethei, inkalpawhna kawng pin chuan ni rei lote a tam mai thei dinhmun a ni.

Ram nuam tak chu: Pu K.C.Lalvunga nupui sawi (AIR-Aizl.) ka la hriat reng chu - Australia ramah khua a kheng a; mahse, kum nga dawn lai hnuah pawh tui thianghlim herh haw tur, thingtlang hmunah pawh eng lai pawh in a awm reng tho, a ti. Hei hi eng nge a awmzia ni ang aw,ka tia, a awmzia ni ber awm a lang ta chu - sawrkarin intodelh nan, inrelbawl nan, inenkawl nana sum a dah thin zawng zawngte tihchingpen a awm ngai lo, a ni loa hman a awm ngai lo, a hmanna tur dik takah an hmang thlap thlap thin. Hei vang hian ram a insawhnghet tawh a, ngial nghet tawh a, eng ang harsatna pawh lo thleng mah se, an buai phah em em lo, a lo ni reng mai. Tehkhin chi rual chu kan ni lo na a, England ram in lo thlir leh teh ang. Kan cheng ringawt pawh chengza dawn laiin a inthlau tih kan hria ang. An tia lawm, “Tunah khuan hmasawn tawh miah lovin ding tawp ta sela, keini hi hma lam panin tlan ta zar zar ila, tun atanga kum 50/60-ah pawh kan umphak chuang lo vang,” an ti. Chutiang taka inthlau chu kan ni, an ni pawh sum eiruk, tihchingpen, etc. awm ngai lo, a nihna tur zela hman thin a ni. Kan han sawi lan tak ramte a nuam awm mang e, mipui nunaute tan chuan thlamuan thlak duh ngawt ang, a tawi zawngin ram nuam tak chu an ni ber mai e.

Kan la tlai lo e: Mizote kan vannei a, hnam dangin min la pawlh buai lutuk lo, kan la hlang tha. Ruahtui kan dawng tha a, chubakah kan ramah engkim deuhthaw mai a tha duh, a chin theih a ni. Tun atangin buh leh bala intodelh tumin han bei tak tak ta ila kum rei loteah chuan kan intodelh thei ang, hun remchang kan la nei a ni. Nakinah chuan kan ram awlte a la rem chang lo mai thei asin, rem chan loh hunah chuan tihngaihna awm tawh lo, inchhir vawng vawng kha a ni mai. Thil siamna hmun industry, factory, company, etc. te pawh hi lehkhathiam rualhote hian ngun takin han ngaihtuah sela, tuna mi kan neih sa ho ang ni lo, liantham deuh, kum rei loteah chuan an din fur thei maiin ka ring. Tichuan, sawrkara chhiah lut a lo thahnem ang a, a lo hausa ve dawn a ni, chubakah hnathawh tur a awm belh teuh dawn bawk a ni. Mizote chu thil man chak tak mai kan ni a, kan tih tawh na lamah chuan, intodelh leh tur pawh hian kan tum phawt chuan kan thei a ni. Kan hma lam hun tur eng mah kan hre lo,chuvang chuan, tun hi hun lawmawm a ni, chhandamna ni a ni, Bible-in a lo tih ang deuh khan, hun tha kan la nei, kan la tlai lo a ni.

Duhthawhna avangin eng eng emaw, thil tih theih loh tur ni awm tak takte pawh kan han sawi a; mahse, kan tum phawt chuan tih theih loh tak tak a awm lo, tih chu kan hre theuh si ang. Kan mamawh ber chu tunge hma hruai ang,hma hruaitu tur a ni. A nih loh pawhin mipkhat tu emaw han ding chhuak nawlh chu awm sela, kan ti ve sup sup thei mai in ka ring. Chutiang han ding chhuak nawlh chu vawiinah keimah/nangmah hi kan ni thei a ni. Tunah hrih chuan kan ram chu a nuam lo a ni, a dik tak chuan, a chhan chu kar khat Silchar kawng a pin pawhin kan tam chu a ni deuh der zel mai, a hahthlak a ni. Awle, ram nuam tak siam tur hian nang leh kei kan pawimawh.., rinawmna, tumruhna kan rilruah lo piangthar se; tichuan, kan kut hnathawhte malsawmin a awm ang a, kan zotlang ram nuam hi chhawrpial run i iang e, kan ti leh thei ngei ang.

Share now