January 5, 2022;  January ni 4, 2023 zan dar 8:20 bawr vel a thi, Bangladesh buai vanga tlanchhia zing a mi Pastor ruang la turin mitlawmngaite an thang mek.

Lawngtlai Post Editor Lalngheta Ralte hnen atanga ZALEN thudawn danin, Bangladesh buaina vanga an sahimna zawnga Lawngtlai district a luhtum zing a mi Pastor Chhawnkhupa (80) chu nizan dar 8:20 khan ramhnuai ah a thi a, ruang la turin mitlawmngai te an kal mek a, Police leh BSF pawh ruang la tur zingah hian an tel.

Pastor Chhawnkhupa thihna hmun hi ramhnuai pilril tak, Mizoram a khawhnai ber Simeinasora atangin ke in darkar sarih kal ngai a ni a, ruang laturte hian vawiin chawmhma dar 11:30 khan Simeinasora an chhuahsan a, Parva-III a ruang rawn thlenpui theih hun tur hi sawilawk hleih theih nilomahse, zanin zanlai pelh ah chuan Parva-III thlenpui hman beisei a ni.

Pastor Chhawnkhupa ruang lak dan tur leh a thihna chungchang ah Lawngtlai DC chuan thil tul pawimawhte bawhzui zung zungin, ruang hi Khawmawi, Lunglei District a an chhungten an la dawn a, Khawmawi ah hian vuiliam tur a ruahman a ni.

Pastor Chhawnkhupa hi Evangelical Baptist Church Pastor ni a hriat a ni a, amah hi  kum 80 lai ni tawh, taksa lama harsatna hrang hrangin a tlakbuak niin, a thih chhan hi Lawngtlai SP C.Lalruatkima chuan tun dinhmunah hriatchian theih a la nih loh thu leh thil awmdan an enzui reng thu a sawi.