Mizoram hian international ramri pahnih Myanmar leh Bangladesh kan nei a, India ram state zingah Tripura, Manipur leh Assam te kan ri bawk a. International ramri chungchangah hi chuan buaina kan nei ngai lo a, a chhan ber chu khuavang ramri kham sa chiang tak a awm vang a ni a, heng ram pahnihte min daidang tur hian lui a luang a. State thenawm Tripura leh Manipur lamah pawh ramri chungchangah buaina awm lem lo a ni. Mahse, kan state pianna Assam lam nen erawh kan indan dawnah chiang taka ramri sawi fel a nih loh avang nge ni, tun thlengin buaina kan la nei a, hei hi chin fel thuai a nih loh chuan ramri buai hi kan nei kum khua dawn niin a lang.

Mizoram-Assam ramri chungchangah hian pawm dan a inang lo thei hle dawn a, Mizoram lamin 1875 ramri kan tanchhan laiin Assam lam chuan 1933 ramri siam an tanchhan ve niin a lang. Mithiam te chuan 1875 ramri ang ni ta se chuan tuna Assam in an luah mek ram zau tak hi Mizoram chhung a ni dawn niin an sawi a. Kum 1933 a ramri siamah chuan Mizote rawn an nih loh avangin an pawm thei lo niin an sawi. Engpawh nise, 1875 ramri hi nei dawn ta tak tak ila kan duh chiah em? Hnamdang mi nuai tel Mizorama awmtir hi a tha em tih chungchangah pawh inhnialna a awm a, tlangram chinah hian kan lungawi tlang mai lo maw tih pawh zawhna awm thei a ni.

Ramri hi chinfel a nih loh avangin tun hnai-ah pawh state pahnihten buaina kan nei zui leh a. Ni 9.10.2020 (Zirtawpni) khan Mamit district chhung Thinghlun khaw daia Mizo thlam chu Assam thuneitute chuan halin an thlai eng emaw zat an tichhe bawk a. Assam lam hian helai hmun hi an area (Singla Forest Range huam chhung) niin an sawi. Ni 17.10.2020 (Inrinni) khan Assam Police leh tualchhung mi eng emaw zat chuan Saihapui ‘V’ khaw bula IR duty post an thiat a, hemi zan hian Lailapur mi thenkhat, Bangladeshi nia hriatte chuan buaina siamin he buaina kal zelah hian hliam pawh eng emaw zat awmin thingpui dawr pawh a kang nual a ni. Tunhnaia ramri chungchang thil thlengah hian mipui tanrualna a fakawm a, sawrkar pawhin fak a hlawh hle.

Tun hnaia buaina chhuahna hmun Vairengte khawtlang hruaitute chuan Assam leh Mizoram inrinaah hma an sawn hret hret niin an sawi a. “Ramri hi sawi thiam a har a, hmalak dan tur kan thiam a, zawi zawia hmalak zel kan tum a. Kan ramri hi tihchian ni lo mah se, tlangram chin hi chu kan hauh bur a ni,” tiin Vairengte Joint VC Chairman R. Lalfamkima chuan a sawi. Vairengtein an hauh chin pawh a zau zel nia sawiin VC hruaitute chuan, “Tun hma chuan police duty-na bul lawka auto rickshaw pawh kan ding thin a, chutih lai chuan Assam Police-ten ‘kan ram chhungah in ding’ tiin min vaw thin a; mahse, tunah chuan stand pawh a thlang ta hle a. Kum 1994 khan tuna auto stand chhakah hian Assam lamin kawng an laih avangin kan buai a, tunah chuan ah hauh tawh lo a ni,” an ti. Tun hnaia buaina chu a inmun tanna a rei tawh nia sawiin, “Assam lam hi thiam takin an rawn tawlh chho hret hret a. Tun hnaiah hri leng vanga Mizoram lut tur endik a ngaih avangin lirthei dingte behchhanin thingpui dawr an rawn siam a, a tha tual tual mai si a. An ram anga an hauh mai kan hlau a, eng emaw thil inmung a awm a; mahse, kan rin aiin a puak hma ta a ni,” an ti bawk. Mizoram-Assam ramria buaina thlentu ber chu Lailapur mi Raju a ni tih sawiin Assam NRC-a tel lo mi nuai 10 velte hian chenna tur an mamawh a, chumi atan chuan Mizoram hi an rawn nek ta niin an sawi bawk.

Tun hnaia buaina thlenna hmun Saihapui ‘V’ khawtlang hruaitute chuan tun hma chuan Assam ram chhungah an awm thin nia sawiin kum 1986 khan Mizoram sawrkar chuan a ram chhungah pawmin 1987 atangin LAD-in hma a la tan niin an sawi a. Saihapui khaw miten Assam ID an nei nia sawi chungchang zawhna chu sawifiahin, “Kan khua lut hmasate chuan Assam ID hi an nei a. Mahse, voters’ ID an rawn siam leh khan kan hming hi a dik mumal a awm lova, Mizoram sawrkarin voters ID leh Aadhar card a siamte hi document engkimah kan pawm a, Assam lamah hi chuan engmah facility dawn kan nei lo a ni,” an ti. Saihapui ‘V’-ah hian in 57 an awm mek niin an sawi a, khaw chhehvelah hnam dang an awm tih loh chu khaw chhungah chuan an awm lo niin an sawi bawk.