Aizawl: MPCC chuan Assam leh Mizoram ramri chung changah Mizoram mipui, Kohhran, NGO leh political party zawng zawng kan tangrual a ni tih lantir nan sawrkar chu heng pawl zawng zawng telna tur ‘Huapzo Meeting’ ko turin an ngen a. Hei hi a harsa a nih pawhin ‘All Party Meeting’ tal ko ngei se an duh tih an sawi.

Nimin khan Aizawl Press Club-ah press mite kawmin MPCC Media chairman Dr. Lallianchhunga chuan ramri buai chungchanga MNF sawrkar hmalak dan chu an en reng tih sawiin tun hnaia Assam chief secretary ten ramri atan kum 1986 a India leh MNF inremna chu constitutional boundary nia an sawi chu Mizo mipui tana pawm theih a nih loh dan leh Mizoramin a pawm chin ramri fiah taka tar lanna nen Assam sawrkar hrilhfiah ngei se an duh tih a sawi a. Lailapur miten Mizoram châk lakna kawngpui National Highway 306 an dangchat chu tha lo an tih thu sawiin, “Khaw pakhat chhunga mi tlem te-in state khat ve meuh châk lakna kawngpui heti chen an dangchat thei hi a hnam ang pawha mualphona niin kan hnam zahawmna humhim a nih theihna turin heng kan nitin mamawh phurtu tangkhang mek te hi an thil phurh nen him taka Mizoram an lo thlen theihna turin Mizoram sawrkarin chhanchhuahna kalpui vat rawh se,” a ti a.

AMC area lockdown a nih mek laia Lailapur a kawngpui dan a ni leh zel chu Aizawl khawpuiin a tuar na zual hle tih sawiin, "Lockdown puanna AMC area a cheng khawsak harsa zawkte tanpuina tur ruahmanna siam turin Mizoram sawrkar kan ngen a ni," a ti a. Central sawrkar-in Mizoram leh Assam ramri buaina laia Sashastra Seema Bal leh Border Security Force dah a tum dan chu Mizoram sawrkarin mipui hnenah dik takin puangzar se an duh tih a sawi bawk.

Zawhna chhangin MPCC hruaitute chuan kum 1875 ramri chu Mizoram-Assam ramri atan an party in an pawm a ni tih an sawi a. Ramri chungchangah sawrkar chu puih an inhuam viau laiin sawrkar zawkin tanrual pui a duh lo zawk nia an hriat thu an sawi bawk.