Ramri chin fel nan Satellite Remote Sensing thiamna

Admin - Aug 14, 2021

Satellite thlalaka ramri rinfel hma hian ramri tur hi thuneituten an tihchian hmasak phawt a ngai

Ruata Sailo - 

Thuhmahruai: Tun hnaiah Assam nen ramri chungchangah inhriatthiam lohna a nasa zual a, thisen a chhuah bakah thihna hial a thleng kha a pawi hle. Central lamin India hmarchhak ramri hi satellite thlalak hmanga chinfel tur leh hemi ti turin North Eastern Space Application Centre (NESAC) chu a vauchher niin sawi a ni a. Mi thenkhatin satellite thlalak atang chuan ramri chu rinfel mai theih turah an ngai deuh pawh a ni mai thei a; mahse, satellite thlalak hi ramri rinfelna atana hmanraw pawimawh tak pakhat chauh a ni. Satellite thlalaka ramri rinfel hma hian ramri tur hi thuneituten an tihchian hmasak phawt a ngai a, chumi ang dungzui chuan ramri chu satellite thlalak atangin rinfel tur chauh a ni. Satellite thlalak awmzia leh a hman thiamna hi Remote Sensing & Geographic Information System (GIS) a ni a, a awmzia tawi tein sawi hmasa ila a tha ang. 

Remote Sensing hi eng nge ni?: Remote Sensing awmzia hi Mizo tawng chuan “khawih lova hriatna” tiin sawi ila kan sawi sual lovang chu. Thlawhna leh Satellites atanga thlalak, a hmuna kal kher lova eng nge a ni tih hriat theihna hi a ni ber a. Ni eng zung (Electromagnetic Spectrum) in lei a thlena a sawh let leh khan a insawhna azirin eng zung sawh let inthen thui zawng (wave-length) leh second khat chhunga a inthen zat (frequency) kha alo danglam a.  He danglamna tak hi Thlalem (Satellite) a sensor-te khan Band hrang hrangah an lo record a, chuta tang chuan eng nge an nih tih kha a thliar hran theih ta thin a ni. Mi zawng zawngin mahni hming sign dan “Signature” kan nei hrang theuh ang hian Satellite Sensor-in ram thla a lak hian “Spectral Signature” hrang an nei vek a. Hemi hmang hian thing hnah hlai leh hlai lo te, a hrinna (Chlorophyl) a pai tam dan a zir te, a pian hmang atang tein an lan dan hi a danglam vek a. Ngaw (forest) leh Mau hmunte pawh a thliar hran theih a, lo kan vah zau zawng te, ram kang awm dan leh a kan nasat dan te, ramhmul (vegetation) awm dan te, lui kawr leh tui awm dan te, ram awih dan te, lei tha leh thalo hmun te, leiin tui a pai tam dan te, a leilung awm dan te  leh sipai chetvel dan (army movement) te thlengin a hriat theih a ni.

Geographic Information System (GIS)?: Satellite data hi tangkai zawka hman leh awlsam zawka hriatthiam an nih theih nan Geographic Information System (GIS) hman a ngai a. GIS hmangin a map-a siam te, a zau zawng te, eng te nge an nih tih te, a awmna hmun (geographical location) te leh thil dang hriat tul pawimawhte awlsam takin a hriat theih thin a. Heng bakah pawh hian kan duh hun apiangah  a siam that theih a, thil dang pawh a dah belh zel theih a ni. Heng data te hi kan hman duh dan azirin information hrang hrang a lakchhuah theih a ni. 

A tangkaina: Tunlai khawvelah Remote Sensing leh GIS hi an hmang tangkai tawh hle a. Khawvel ram hrang hrangte’n Satellite chi hrang hrang an kap chhuak reng a. India ram pawhin Indian Remote Sensing Satellite (IRS) series hrang hrang bakah resolution tha zawk nei Cartosat 1 leh 2 te pawh a kap chhuak tawh a. Heng thlalem thlalakte hmang hian leilung hausakna (natural resources) zawn chhuah a awlsam a, sum leh pai leh tha leh zung sen a tlem bakah a hun takah data pawimawh neih theih a ni. Tunlai khawvela pawimawh em em, hmasawnna tluantling (sustainable development) duanna atan te, khuarel chhiatna (natural disaster) chi hrang hrang zirna atan leh lo hmachhawn dan tur duanna atan te leh ram venhimna (defence system) thlengin tangkai taka hman a ni. Ramri pawh data hman azirin chiang takin a rin theih a. Boruak bawlhhlawhin nghawng a neih dan te leh medical lamah pawh tangkai taka hman a ni tawh bawk. 

Ramri chin hriatna atan: Assam ram nen ramri chungchangah inhriatthiam lohna a awm mek a. Survey of India-in kum 1971 vela map (SOI Topographical sheets 1:50,000) an siamah khan ramri tak an chian loh (la tihchian tur?) vangin hmun tam takah dash dash (- - - ) in an dah a. Tunah hian Central lamin ramri chinfelna atan Satellite thlalak hman nise a ti a, he mi thawk tur hian North Eastern Space Application Centre (NESAC) chu a rawn vauchher niin a lang. Satellite thlalak atangin ramri hi rin fel mai theih a ni lo va, ramri rin felna atan erawh hmanraw tha tak a ni. Ramri rin fel turin eng ramri ber nge behchhanah hman a nih ang tihte hriat a ngai a. Bengal Eastern Frontier Regulation (1875) behchhan hi chuan Assam hian an pawm mai theih a rinawm lo va, Inner Line Regulation 1933 behchhana North Eastern Area Reorganisation Act (1971) ramri, Survey of India-in behchhana ramri an rin (chhin) ang hi chuan Mizoramin kan enkawl lai ngeite pawh hi eng emaw zat kan chan dawn a. Chuvangin, ramri hi state pahnihte hian siam fel kan duh tak tak a nih chuan a tu lam ve ve tan pawh insiamrem a ngai dawn a ni. 

Mizoramah Satellite Remote Sensing: Mizoramah hetiang thiamna hmanga hna hrang hrang thawk mek leh India hmarchhak zinga Centre hlun leh upa ber pawl, Mizoram Remote Sensing Application Centre (MIRSAC), Directorate of Science & Technology-ah Scientists an awm nual a. An thiamna hi hmang tangkai ila, tuna data awm angte a that tawk loh chuan data tha zawk hmangin ramri hi zirchian nise, sum pawh a tul angin sorkarin ruahman se. Satellite thlalak bakah a tul dan azirin Unmanned Aerial Vehicle (UAV)/Drone te pawh hman nise a tha ang. Ground verification hi Differential Geographical Positioning System (DGPS) nen tih ngei nise, coordinates pawh chiang takin a hriat theih dawn a ni. Tunhnaia Assam-in Mizoram chhung hmun hrang hranga chet an lak dante kha a map nen lantir nise, hemi bakah hian kan ramri chin hi lo zir chian hmasak ni bawk se. Hei hian hmalak zelna kawngah nasa takin min pui thei dawn a ni.  

Tlangkawmna: Kan buaina hi a hma anga awm hrih (Status Quo) tihah hian tawp lo se, status quo hi chu na chhawkna ei ang chauh a nih avangin alh chhuah hun a nei fo dawn a. Thufing pakhatin “Thir chu a lin laiin deng rawh” a tih angin kan hotute hian tha thlah lovin a lin lai ngei hian deng zui zel se. Tunlai thiamna hmanga ramri hi tihfel ngei nise, a theih chin chinah khuavang ramri khamsa zui theih ni bawk se a tha lehzual ang. 

Share now