Aizawl August 16, 2024 : Vawiin khan Congress Party chuan Congress Bhavan-ah ‘Friday Political Session’ an hmang a. He hunah hian MPCC General Secretary PC Laltlansanga chuan thu sawiin, ZPM chu la sawrkar ngai lo, enchhin sawrkar an ni a. Anmahni la sawisel nan a la hma a, kum pawh a la vei lo a ti a, chutihrualin ramri-a Assam nen an inbiaknaah erawh a rilru a nat thu a sawi.

Ramri chungchanga inbiakna a duh khawp loh thu sawiin, "ZPM hi pawl hrang hrang intelkhawm an ni a, an bulpui ber chu ZNP an ni a, an Chief Minister pawh ZNP President ni thin Lalduhoma a ni. ZNP kha Nationalism tuipuitu an ni a, MNF atanga lo piang an ni. ZNP an nih lai khan ramri chungchang an lo buaipui ve tawh thin a, ramri buaina apiangah an kal ve thin a. ZPM an nih hnu pawn ramri buaina an aupui nasa, ramri buaina apiangah an kal thin. Nationalist inti, ramri buaina apianga kal thin an ni chung hian, hmanni lawkah kan Home Minister leh Assam Boundary Minister Atul Bora inbiakna minute ka lo hmu a, ka beisei ang a ni lo hle mai a, ka rilru a na hle a ni."

"Aitlang-ah Assam sawrkarin an duty post te pawh turin kawngpui an lai a, Mizo huan leh thlai te a tichhe tam ber tur zawngin an che a. Chung te chu titawp tur a hrilh leh dodal lam reng reng an inbiaknaah khan kan sawrkar hian an sawi lo a, chu aiah chuan cultural programe te neih ho an rel zawk a ni," a ti.

PC Laltlansanga chuan, "ZPM sawrkar hian an sawrkar tirh khan an CM khan ni 100 chhunga tihhlawhtlin tur an puan zingah khan MSSSB thiah leh Board din chiah a ti hlawhtling a, a bak chu a tihlawhtling lo vek a ni. Year of Consolidation kan puang ang tih te, Restricted Tender kan ti ve lovang tih te chu an ngaipawimawh lo hle a ni."

"CBI General Consent kan pe an tihte hi mipuiah lanmawi tumna mai a ni. A takah an pe tak tak lo, pe tak tak nise Kuhva rah tawlh chhui tur te khan CBI hnenah engah nge case an thehluh loh? Kuhva ro tawlh te kha CBI chhui an phal lova, Mizoram Police an that tawk thu Court ah pawh an thlen zawk a ni," a ti.