Aizawl: Vawiin ni 9.8.2022 (Thawhlehni) khan ramri chungchangah Mizoram leh Assam aiawhte chu Aijal Club ah an inbia a, October 2022 ral hmain Guwahati ah inbiakna neih leh nise an ti.

Inbiaknaah hian Mizoram aiawh te hi Home Minister Lalchamliana chuan a ho a, Aissam aiawhte hi Border Protection & Development Minister Atul Bora in a ho bawk. Home Minister Lalchamliana hi I&PR Minister Lalruatkima, Home Commissioner 
H.Lalengmawia leh mi pawimawh dang ten an tawiawm a. Assam Border Protection & Development Minister Atul Bora hi Housing & Urban Affairs and Irrigation Minister Ashok Singhal, G.D. Tripathi, IAS, Commissioner & Secretary, Border, Govt. of Assam bakah Jagannath Jyoti Bora, ARO, Border Protection & Development ten an tawiawm a ni.

State pahnihte hian thuchhuah intawm (joint statement) siamin nikum August ni 5,2022 a inremna an lo siam tawh chu vawnnun zel nise an ti a. State pahnihte chu remna vawnghim zel tura hmalak nise, ramri district a Deputy Commissioner te chu thla 2 danah vawi 1 tal inbia se an ti a. Ramri hnaiha lo leh huan neitute harsatna siam zawnga hmalak loh nise an tih bakah High level palai (delegation) inbiakna chu 2022 October thla chhungin Guwahati ah neih nise tih te a ni a. Joint statement ah hian Assam aiawhin Atul Bora leh Mizoram aiawhin Lalchamliana ten an ziak a ni.

Inbiakna neih zawha Press mite an kawmna ah Assam Border Protection & Development Minister Atul Bora chuan inbiakna chu boruak tha tak hnuaiah neih a ni tih sawiin ramri rinfel (ground demarcation) pawh tih thuai an beisei tih a sawi a. Chief Minister level inbiakna pawh neih theih thuai an beisei tih a sawi.

Home Minister Lalchamliana pawh inbiakna thu leh hla chu Deputy Chief Minister kaihhruai Mizoram Boundary Committee hnenah thlen lehin October thlaa inbiakna neih leh tura an thu ken turte an sawi dawn tih Press mite a hrilh bawk.