Aizawl: Bible Society of India, Aizawl Auxiliary chuan tunlai hrileng, Covid 19 vanga Mizoram khaw hrang hranga ramri depa duty post hrang hranga dah tur Mizo Project Holy Bible copy 312, Bengali Thuthlung Thar copy 40 leh Bengali tawng Chanchin tha Johana ziak copy 300, a vaiin copy 652 chu Zirtawpni chhun dar 12 khan Bible House, Synod Conference Centre atangin a thawn chhuak a. Rev.Dr. H. Vanlalauva, Auxiliary President-in tawngtaina neiin heng Bible-te hi Pathian hnenah a hlan a ni.

Rev. Remlalfaka, Auxiliary Secretary chuan heng Holy Bible leh Thuthlung Tharte hi mamawhtute tan a bik taka BSI-in a thlawna a pek thin thu leh tun tumah pawh hian hrileng vanga Mizoram khaw hrang hranga ramri hrula venbuk nghak tur, duty kalte zingah a duh apiangin an chhiar mai theih tura dah a nih thu a sawi a. "Hrileng vangin lockdown in kan awm mek a, nimahsela, Pathian thu erawh phuarin a awm ve lo va, lockdown theih a ni ve lo. Khawvel in Pathian thu a mamawhna a zual tulh tulh zawk a, Pathian thu theh darh hna hi chawlhsan ve a rem lo a ni. Bible Society chuan hun harsa ah pawh a theih dan kawng kawngin Pathian thu sem darh leh pek chhuah hna a thawk zel dawn a ni," a ti. Heng Holy Bible te hi BSI Branch hrang hrang 10-ah thawn chhuah a ni a. Branch hruaitu ten an Branch chhung duty post hrang hrangah a tul angin an sem chhuak leh dawn a ni.