ZALEN October 31, 2024 : Kumin 2024 hian Ran Chhiarpui vawi 21-na (21st Livestock Census) India ram pumah neih tur a ni a, Kum October ni 26, 2024 atanga tanin February 2025-ah zawh hman tura ruahman a ni. Hemi hun chhung hian khua leh veng tinah Enumerator-ten anmahnni bial tura ruat theuhah ran chhiar hna hi an thawk dawn a ni.

Ran chhiarpuiah hian Mizorama ran vulh ran chi (Species) hrang hrang : Bawng, Lawi, Sial, Kel, Beram, Sakawr, Vawk, Ui, Sai (Vulh lai), Sazupui, Ar, Varak leh arva chi dang kan vulhte chhiar vek tur a ni a, Zawhte erawh chhiar tel a ni lovang. Rante hi a breed hrang ang zelin leh an kum bithliah leh gender wise zelin chipchiar taka chhiar tur a ni.

Ran chhiarpuia Data kan lakkhawm hi ranvulh lama hmasawnna tur Planning, Policy leh Programme hrang hrang duan kawngah information pawimawh tak a ni a. Chutiang Programme leh Policy-te tihlawhtling tura plan leh project tha siamna atan Census Data hi hman thin a nih avangin Census Data dik leh rintlak kan neih hi a tul em em a ni.

Chuvangin he Chhiarpui vawi 21-na ah hian data dik leh rintlak kan neih theihna turin A.H & Vety Department, Mizoram chuan Mizoram khua leh veng tina khawtlang hruaitu zawng zawng: Village/Local Council te, NGO te leh mipuite anmahni khua leh veng theuha ran chhiarpui hnathawktu Enumerator-te tha taka lo thawhpuia, puih an ngaihna apianga lo pui zel turin a ngen a ni.