Mizo tlangvalten an hmarchhakpui, Nagaland lakah beiseiawm taka bul tan chungin an hneh zo lo va, Ranji Trophy 2023-24 group stage-ah an inhnehtawk a. Chak zo lo mah se thawh (innings) hmasa zawka an dinhmun a that zawk avangin point thum an hlawh chhuak thung.

Gokulbhai Somabhai Patel Stadium, Nadiad, Gujarat-a Plate Group inkhel vawi hnihnaah hian Nagaland-in vaw hmasain run 211 chauh an tlin theih laiin Mizoram hian run 356 an siam ve thung a. Ni li chhunga chak zawk an awm hman loh hnuah innings khatnaa hmahruaitu zawkin point thum an hlawh a, Nagaland-in point khat an hlawh ve thung.

Innings khatnaah hian Mizoram tan Mohit Jangra chuan mi paruk zet a vawm hlum a, KC Cariappa chuan mi pathum a vawm hlum ve bawk a. Nagaland tan Sedezhalie chu vaw chhuak tam ber niin run 45 a siam a, puitu tha a nei lo.

Mizoram tan vuak thawh khatnaah a lut hmasa pathumten run 10 siam tling lo vek mah se Agni Chopra chuan run 164 a siam a, Jangra chu a tawp thlenga damin run 113 siam bawkin run 356 lai an tlin theih phah.

Nagaland hi thawh hnihnaah insiam thain run 463 siamin mi pasarih an thi hman tihah an duhtawk (declare) a. Innings khatnaa siam tam ber, Sedezhalie chuan run 179 zet thawh lehin R S Jaganathsinivas (run 86), Sumit Kumar (run 74 n.o) leh opener Joshua (run 70) ten an pui tha viau bawk a. Mizoram tan Jangra bawk langsarin mi pathum a vawm hlum.

Nagaland hian innings hnih atangin Mizoram tan chak turin run 319 siam tur an chhawp a. Mizo batter-ten hun tam tawh lo takah umin khelh hun tura ruahman hun chhunga um pha lovin run 221 siama mi pariat thi hmanin hun a zo va, chak zawk awm lovin an inhnehtawk.

Ranji Trophy-ah hian Mizoram hi Plate Group-ah state/association dang panga nen an awmho va. Inkhel kualin a sang paliin semifinal an lut thei dawn a. Point thum an neih tawh nen palina dinhmun an hauh mek a, khelh thum an la hmabak.

Zirtawpni atang hian Lal Bahadur Shastri Stadium, Anand, Gujarat-ah vawi hnih khelha tlawm ve ve, Arunchal Pradesh nen an inhmachhawn ang.

Board of Control for Cricket (BCCI)-in state/association tana kum tin a buatsaih thin, Ranji Trophy hi first-class championship-ah chuan ngaihhlut hlawh ber a ni a, kum 1934 atanga khelh tan kha a ni.

Kuminah hian Elite-ah group paliah team pakua theuh awmin Plate-ah Mizoram leh mi dang panga an awm a. Plate-a final lut team hnih chu season tharah Elite-ah an kai sang dawn a, kumina Elite-a awm zinga a tichhe ber team hnihte chu Plate-ah an tlahniam ve thung ang.

Group stage inkhel hi innings hnihin ni li chhunga khelh zawh tura ruahman a ni a. Knock-out stage atangin ni nga chhunga khelh a ni ang.