Aizawl: Nimin khan COVID-19 hri vei hmuh chhuahna hmanrua Rapid Antigen Test Kit 20,000 chu Mizoram a lo thlen belh a, heng test kits hi Chief Minister's Relief Fund atanga sum sanction hmanga lei a ni. Thla hmasa August ni 22 khan COVID-19 enfiahna hmanrua hi 10,000 chah thlen a lo ni tawh a, tunah hian RAgT Test Kit hi 20,000 dang a lo thlen belh leh ta a ni.

Tun tuma Test Kit lo thleng hi thla kalta August ni 26 khan Delhi Mizoram House-ah dah fel vek a ni tawh a. A rang lama Mizoram rawn panpui tum a nih laiin West Bengal lamah total lockdown puan a nih avangin tlemin a khawtlai phah ta hret a ni. Tuna RAgT lo thlen belh leh inkar chhung hian RAT Test Kit hman kawngah indaihlohna leh chatlak engmah a awm hman lo tih Health Department thuneitute chuan an sawi a ni. Tunah hian dan pangngaiin COVID-19 endik hna pawh kalpui chhoh reng a ni bawk.