Aizawl: FCS&CA Minister K. Lalrinliana chuan, “Mizoramah thla tinin ration atan buhfai quintal nuai 1.1 sem thin a ni a, chutah chuan Mizo thar a tel ngai lo a, Mizote hian ei leh bar ah kan intodelh a pawimawh a ni,” a ti.

Nimina Bilkhawthlir Agro Farmers' Society kum 10 tlin lawmna hun a hmanpuina ah he thu hi sawiin FCS&CA Minister chuan SEDP chu dinhmun ngelnghet nei loten dinhmun ngelnghet an dina, an tu leh fate tan thleng pawha rochun tlak dinhmun nghet an neih theihna a tana hma lakna tur a nitih a sawi a. Minister chuan Agro Farmers Society te hmalaknaa sawrkarin Mizote buhfai thar a lei thei chu lawmawm a tih thu sawiin, lei tur an neih chhung chu sawrkarin a lei zel tur thu a sawi bawk.

Agro-Farmer Society Bilkhawthlir hi kum 2009-a din niin tun dinhmunah member 10 an awm mek a, kumin kumtir khan an member-te tharchhuah leh an pawlin an lakkhawm buhfai quintal 23 chu Mizoram sawrkar Supply Department ah an chhunglut tawh a, hei bakah hian tun dinhmunah sawrkara chhun luh tur quintal 70 chuang nei khawl tawhin quintal 300 vel an tlin theih an beisei a ni.