Aizawl January 18, 2023: Secretary, Food, Civil Supplies & Consumer Affairs Department chuan buhfai a thlawna sem tura sawrkar laipuiin ruahmanna a siam angin thla khatah PHH (card pawl) te chuan mi pakhat tan buhfai 5 kgs leh AAY (card eng) te chuan card/chhungkaw khatah buhfai 35 kgs an dawng tawh dawn tih thuchhuah a siamah a tarlang.

Ministry of Consumer Affairs, Food & Public Distribution, Government of India in Notification ni 30.12.2022 hmanga a tihchhuah angin National Food Security Act, 2013 hnuaia hamthatna dawng thei (PHH leh AAY ration card nei) te tan January ni 1,2023 atang khan a thlawnin buhfai kum khat chhung atan sem tan a ni. Hripui len hma-a PHH beneficiary-te quota pangngai (5 kgs per head) baka State Sawrkar-in 3 kgs @ Rs. 15 per kg a belh thin chu a thlawna PHH te’n an quota hi an dawn tawh dawn avangin tih tawp rih a ni. Hei hi a tul anga ennawn leh theih a ni.

NFSA, 2013 Section 3 in chanvo a pek angin, thla khatah PHH (card pawl) te chuan mi pakhat tan buhfai Kg. 5 leh AAY (card eng) te chuan card/chhungkaw khatah buhfai Kg. 35 an dawng thei a, hei hi January atanga December, 2023 chhung chu a thlawn liau liau in an dawng ang. COVID-19 hripul len avanga Central Sawrkarin PMGKAY hnuaia AAY leh PHH beneficiary te tana quota pangngai baka mi pakhat zelah Kg 5 buhfai a thlawn-a a pek thin chu hri leng a ziaawm tak avangin tih tawp a ni tawh bawk.