Mizoramin thla khat chhunga buhfai a mamawh zat tlangpui chu 96,857.74 quintals a ni a; mahse, ration card awm zat azirin a danglam thin a ni. Sawrkarin thla khatah buhfai leina atan Rs. 14,08,57,888 vel a hmang tlangpui a, hei pawh hi monsoon stocking lai leh lei tlem lai chuan a danglam thin bawk. 

Aizawl; Mizoramah ration card leh aadhaar card thlunzawm lote chu FCS&CA chuan ration pek an ni tawh dawn lo an ti.

ZALEN RTI zawhna chhangin Food, Civil Supplies & Consumer Affairs Department chuan ration card leh Aadhaar card thlunzawm hna chu May, 2022 thleng khan 91.37% thawh zawh tawh a ni tih an sawi a. Ration card leh Aadhaar thlunzawm lote chuan biometric authentication kaltlangin ration an la thei tawh lo tih an sawi a. Aadhaar seeding (Aadhaar number leh document pawi-mawh thlunzawm lo) ti lote chu ration pek an nih tawh dawn loh thu hi ni 28.03.2022 khan order tihchhuah a ni tawh tih an sawi bawk.

RTI zawhna an chhannaah FCS&CA Department chuan Mizoramah sakhuana leh thil dang vanga ration card nei duh lo an awm leh awm loh department chuan a hre lo tiin, ration card nei duh lote tan sawrkarin buhfai leh thil dang tun dinhmunah chuan pek tumna a nei lo tih an sawi. 

Tun dinhmunah Mizoram pumah ration card nei chhungkua 2,81,592 an awm mek a, heng zinga 1,15,077 chu card var (Non FSA) an ni a, card pawl nei (PHH) 1,40,967 awmin card eng (AAY) nei 25,548 an awm bawk. One Nation One Ration Card chu ni 1.6.2020 atangin Mizoramah kalpui tan a ni a, tun dinhmunah chuan ONORC-ah harsatna a awm lo a. May, 2022 bik khan One Nation One Ration Card hnuaiah transaction 205 a awm tih an sawi bawk.