DOWNLOAD OUR APP

Read latest news on your phone
play-store app-store
app-store
ad
Rawmi hi agribusiness hmanga kalpui tur a ni e
titi ZALEN
May 23, 2021
F. Vanlalpeka
IMCS Agribusiness Project
Aizawl,Mizoram
 
 
Kan leilung atanga dehchhuah/tharchhuah  theih chi, a bikin, kan huan-lo-ram enkawl mekna hmuna tharchhuah theih leh  luhchilh tlak, Agribusiness Project  item atana kalpui ngamte chauh buaipuina  hi kum 2012 atang khan Mizoram, Meghalaya leh Manipur state-ah te kalpui chhoh zel a ni a. Agribusiness kan tih chuan, tharchhuah tur chintirna/phuntirna (plantation) atanga tharchhuah (production), tharchhuah atanga sawngbawl (processing) leh sawngbawlna atanga hralhna (marketing) zawngte suartluan vek hi a ni.
 
 
Kan rama tharchhuah tak tak tham nei tur hian chin tur item thlan bikah fimkhur a ngai hle. He project kengtu, Interstate Marketing Co-operational Services – IMCS Agribusiness Project hian market lama a thlunzawmte mamawh  ber item leh a tharchhuaktu (farmer)-te hlawkpui ber tur item dawhzawm hi pawimawh hmasa berah a dah zel a.
 
 
Chuvangin, he project atan hian market lama mamawhtu ngah ber item zinga mi, khawvela sSerthlum chi tam tak (29 varieties) zinga tha ber, Florida (USA) quality – Valencia Orange hi project item-ah thlangin kum 2012 atang khan phun runpui kalpui chhoh zel a ni a. Khawvela kuhva (betel nut/palm fruits) quality tha ber Thailand-Malaysia areca nut item hi thlang lehin kalpui chhoh mek zel a ni bawk a. Khawvela thing thang chak ber/puitling hma ber, paulownia tree leh khawvela thlai man to bera an sawi fo, hop shoots plant te pawh hi he project item zinga telh tura buaipui mek a ni. 
 
 
Kum 2015 atang khan he project item zingah hian Mizoram  tualto mau (Mizoram indigenous bamboo) telh ve a lo ni tawh a. Mizoramin mau kan ngah ber, mautak (Malocanna Baccrifera)  bik hi buaipui hmasak  ber a ni a. He mautak kan neih sa hralh theihna awmchhun, Cachar Paper Mills enkawltute leh mau supplier (mahalder)-ho kalchilhin agreement-te siam a ni a. Nimahsela, rei tak chhung mau supply bill an pek theih loh tak zel avang leh an buai chhoh zel tak avangin tawpsan a ngai a. Mizoram mautak hralh tura hmun danga buaipui zui zel pawhin awmzia a nei zui ta lo a ni. 
 
 
Mizoram tualto mau dang, rawnal (Dendrocalamus Logispathus), raw-thing (Dendrocalamus Logispiculata Gamble), phulrua (Dendrocalamus Hamiltonii) leh rawmi (Dendrocalamus Sikkimensis) hi a mal tetea bihchian a ni bawk a. Heng zinga pakhat eng ber emaw hi project item-a telh tur a ni a.
 
 
Mizoramin mau a neih zinga project item-a telh tur hian tual chhung, ram chhung leh ram pawn thlenga market thlung zawm tura fuh ber, tharchhuak tak tak tura buaipui tlak/bul tanna tlak ber leh Agribusiness criteria hmanga kalpui theih tur, industry-base-a tangkai/hlawk ber turte uluk taka buaipui hi thil tul hmasa ber a ni.
 
 
India ramah mau lam mi thiam rualho, bamboo expert - Kerala Forest Research Institute (KFRi)-ten khawvela mau tha leh hman tlak ber (commercial spicies of bamboo) 25 an thlanchhuah zingah Mizoram rawmi (Dendrocalamus Sikkimensis) hi a tel pha a. Khawvela mau lian ber, a pum  len zawng pawh (diameter 12-20cm) inang vek, heng, Dendrocalamus Asper, Dendrocalamus Brandasii leh Dendrocalamus Sikkimensis tar lan pathum zinga rawmi a tel pha ve zel hi a vanneihthlak tak zet a ni. Kum 2016 atang khan  luhchilh nghal a ni a.
 
 
Marketing survey kan neih tawhna a piangah ram chhung leh ram pawn lama mau hmanga ei zawna lian (bamboo industries & business) kalpuitute reng reng hian mau lian a piang hi an duh zel a, an hmang zel thin. Tunlaiah, mau chin a niha an phun reng rengin mau lian ber ber an kalpui zel tawh tih kan hria. Mau pum lianho rau rauvah mau deh nuam/sawisak nuam leh a seng (harvest) awlsam zawk a awm leh a. Chutiang mau lian deh nuam chu mamawh zawkah a tang thin. Entir nan, Mizoram mau phulrua pawh hi lian ve deuh mah se, rawmi ai chuan deh a khirh daih zawk a. Ngaihtuahna tharin phulrua pawh hi  luhchilh tum a ni.
 
MIZORAM  TUALTO MAU  RAWMI (DENDROCALAMUS SIKKIMENSIS): Mizoram leilung luah tirh atanga lo awm tawh, kan lo neih tawh, kum 45 dan zela tam thi thin a nih avanga hmuh tur vang tawh tak, Mizoramin mau kan neih zinga hmuhnawm khawpa lian leh mawi ‘Rawmi’ hi Tuivawl lui phaikuam  ram lum tak hmunah  hian tlemte hmuh tur a la awm a .
 
 
IMCS Agribusiness Project item ‘Rawmi’ hi kum 45 dan zelah a tam thi thin tih kan hria a. Helai hmun vela mi hi kum 1975-ah khan a lo tam thi tawh tih kan hre  bawk a. A tam thih kum zelah  hian  rahin, a chi (seeds) lak theih a ni thin a. kum 2020 hi a tam thih leh kum tur tih hriain kan nghak a ni. Nikum 2020 khan a rawn tam ta ngei a, a par a, a rah ta ngei a.  Vanneihthlak tak maiin a chi (seeds) kan khawm ta nghe nghe a. 
 
MIZORAM  CHHUNGA HUAN/RAM NEITUTE HNENAH  RAWMI PUICHHUAH THAM PHUN TUR KAN PECHHUAK THEI TA : Mizorama huan/lo/ram neituten  mahni ram ngeia khawvela mau lian ber leh hlu ber hi Agribusiness Project hmanga chinga phun theih a ni ta hi ram hmasawnna tur a ni e. He Mizoram tualto rawmi hi phai boruak lum tak hmunah awmin, hmun lumah a tha thei hle tih hi a taka hriat theih a ni. He hmun lum tak atang ngei hian a chi (seeds) pawh hi lak a ni. Ram lum lama ching tur te tan pawh buaina a awm lo. Mizorama kut hnathawka eizawng tam takin he mau zet hi chu an duh tak zet a, Agribusiness hmanga kalpui tur a ni hian a tihlim hle.
 
 
Ram neia huan nei te tan a hlawk hle dawn a, Zokhaw lama kut hnathawka ei zawngtute tan phei chuan he rawmi hi a tlem a tam sawi lova phun ngei ngei chi a ni e. He mau hlutna hrechiang apiangten an mamawh tam zel bawk. Mizoram tan mau lian chi lo hi chu sum hailuhna tura luhchilh tak tak theih a ni lo. Kan hrechiang thawkhat viau tawh e. He rawmi hi a hmun ngeia ngaihven theihna: IMCS Nursery Farm, Lengte . Contact : + 91 – 8837056218/ 8014010889. Email : IMCSFARM2018@gmail.com

Latest News & Chhiar Hlawh