Aizawl: Rural Development Minister Lalruatkima chuan Zirtawpni khan Sateek Community Hall ah Mahatma Gandhi piancham 150-na hriatreng nan Shyama Prasad Mukherji RURBAN Mission (SPMRM) kaltlanga Aibawk RURBAN Cluster hnuaia Eco-tourism activity hrang hrang a hawng.

Lalruatkima chuan Mizoramah RURBAN cluster pali a awm tawh thu sawiin, “RURBAN cluster kan neih hmasak pahnih Aibawk leh Thingsulthliahah te tha taka hna kalpui a nih avangin sawrkar laipuiin cluster dang pahnih Khawzawl leh East Lungdar RURBAN cluster min pek belh leh a, a aia tam nei turin tan lak chhunzawm zel tum a ni,” a ti a. “Rural Development Department official-te bakah RURBAN cluster hnuaia khawtlang hruaitute leh khawtlang mipuite inpekna avangin kan hming a tha a, a lawmawm hle a ni,” a ti bawk.

Aibawk RURBAN cluster hi Mizorama SPMRM kalpuina hmasa ber a ni a. Kum 2016-2017 atang khan Aibawk RURBAN cluster hnuaia khaw hrang hrang 11-ah hna hlawm chi hrang hrang 16 kalpui a ni a, chung zinga hlawm khat eco-tourism hnuaiah activities hrang hrang kalpui a ni.

Sateek Community Hall-a hun a hman zawh hnuah Minister hian Phulpui tlawhin Phulpui Eco Estate lungphum a phum nghal a ni.