Aizawl February 1, 2024 : MNF chuan ZPM sawrkarin sum a enkawl dan chungchangah Sawrkar hmasa sum enkawl thiamlo a an puhna chu anmahni ngeiin sum an enkawl hneh loh zia an pholang chiang ta mekah an ngai a, regular payment tih theih lohin Treasury an khar ngei an ti bawk.

Lalchhandama Ralte in thudik a sawi ngei tiin, "December 2023 chawhnu lam ni 15 chhung khan Emergency a pekchhuah tul tak tak bak regular payment chu State Finance lamin Treasury te an tihtawp tir vek a. Hemi chungchang sawichhuaktu, Leader of Opposition Lalchhandama Ralte MLA, chu thudik lo sawi ang hialah puh a ni a. Pu Chhantea hian thudik a sawi ngei a ni," an ti.

MNF chuan, "Sawrkar hmasa Finance Minister chu ZPM party hian sum enkawl thiam lo leh ti tha duh lo ang hialah an puh thin a. MNF sawrkar laia Treasury-in sum pekchhuah a control zeuh zeuh thin kha Treasury khar tiin an lo aukhum chamchi tawh a. Sum enkawl thiam tura insawi ZPM sawrkar chuan an rawn tawng ve ta a. An tawngkam cheh ang chiah an chunga tla ta chu anmahni ngumkhak hmu lo ang maiin, Treasury khar a ni lo tiin, an rawn tangkhawh leh ta a ni," an ti.

ZPM chu inpawmthiam tura an duh thu sawiin, "Heng an sum enkawla harsatna an tawh chu thup buai lo tur leh an harsat avanga Open Market Borrowing atanga Vaibelchhia 80 an puk hi sawimawi tum lovin, sum enkawl an thiam lovah inngai se MNF chuan a duh a. Treasury thawktute hmanga insawi thiam tum chhen tawh lo turin a phut tlat a ni," an ti.