ZALEN August 12, 2025 : Sairang Rel kawng hawn mai tawh tura ram nei compensation la ve lo te chuan vawiin khan Aizawl Press Club-ah chanchinthar lakhawmtute an kawm a, an pawisa lak tur ang tun thla chhunga an dawng lo a nih chuan an ram chin hung an tum thu an sawi.

Compensation la lo ram 14 neitute chuan an ram chin an hung tur thu hi Aizawl DC leh Railways-ah bakah Prime Minister leh Railway Minister-a thlen an tum tih an sawi a, a theih ang anga hmalak an tum. Nimina press conference nei zingami Zothanpari chuan Railways dawrin Delhi leh Guwahati-ah tum thum ve ve a kal tawh tih a sawi.

Sairang rel kawngin a tan tlanga ram nei compensation la ve lo ten chuan Aizawl DC leh Railways lam chu an pawisa dawn tur chungchangah hian an inpuhtawn tih an sawi a, pawisa hi an pe thei lo a nih chuan pawisa an pek te ramah rel kawng chu suan mai se an ti. Compensation la ve lo te hi mi 14 an nih thu an sawi. 

Mi 14 te sum dawn tur hi 14,56,29,759 a ni an ti a. Rel kawng hi August 18, 2011-ah survey neih tan niin 2016 khan compensation hi a dawngte chu pek zawh an ni. Tuna compensation la dawng lo mi 14 te zingah hian mi pali chu chengkhatmah la dawng lo an ni a, a then hi chu an dawn tur zat la dawng lo te an ni.

Aizawl DC chuan he compensation an dawn tur ang la dawng lo te hi a kokhawm tawh a, inbiakna te pawh an nei a, August 19, 2025 hian an ram chu spot verification ti that sak tura thutlukna siam a ni a, mahse, dan pangngai anga file a kal leh anih chuan kum 2/3 vel a ngai leh dawn a, rel a rawn luh tawh dawn bawk si avangin an ngaihthah an hlau a ni.

Compensation la kim lo zingami Lalchhuanawma chuan Lei thuthmuna a In semi concrete chu DC atangin compensation 3,10,100 a dawn tawh thu a sawi a, mahse, Railways lam atanga thu a dawn danin Cheng nuai 10 chuang dawng tur a nih thu an hrilh avang leh pek a la nih chuan loh avangin an zingah hian a tel ve thu a sawi ve bawk.