ZALEN July 1, 2025 : Kan hma lawkah hian rel chuan Mizoram a rawn lut tan dawn ta reng mai a. Rel rawn lut tur hian thatna tam tak neiin, eng emaw kawng zawng chuan kan hnam tan that lohna pawh a rawn keng tel ngei dawnin Mizoram Merchant Association (MIMA) chuan an hria a. Ram leh hnam a la him hram hram theihna anih beiseiin Home Minister k. Sapdanga hnenah rawtna leh ngenna an thlen.

Mizoram chu Special area a nih angin Rel lo lut mai turah hian ILP hi felfai leh uluk leh khauh taka kalpui ngei ni se. Tin, tun hmaa ILP lo kalpui dan ang mai maia ILP hi kalpui a nih chuan hnam inchim ralna a hla dawn lo hlein Mizoram Merchant Association (MIMA) chuan a hria a, eizawnna kawnga chimral nih lohna turin ruahmanna fel fai tak siam turin Home Minister hnenah ngenna a thlen a ni.

Tun hmaa ILP enforce danah hian tha viauin lang mahse, thenkhatah duh khawp lohna a awm thin an ti a, Vishal Mega Mart neitupa Mr. Rajesh Mishra trade License neih dante leh 31.1.2025-a Lengpui Airport a ILP pek dan fel lo tak hmuh chhuah leh a nih thu te an sawi. Hetiang anih avang hian Rail a lo lut dawn a, uluk leh khauh taka ILP enforce dan kawng ngaihtuah hram hram turin Home Minister hi an ngen a ni.

MIMA hotute chuan hetiang hian rawtna an thlen nghal bawk a ni.            

1. Rail lo luhna tantir Bairabi Rail Sation a, tuna ILP Checkgate hi tih changtluna, fimkhur leh uluk taka ILP hi pek chhuaha, ILP neisa thlenga uluk taka check mai bakah, computerise vek ni se.

2. Bairabi leh Sairang Rail Station nen a inkar Roadside station leh Halt station, Sairang Station thlenga chhuk leh lo chuang lutte, uluk leh fimkhur taka ILP hi tih nise.           

3. Sairang Rail Station pawh Passenger-te kal darh nghal mai theih loha hung bawk nise tiin MIMA hruaitute chuan an ngen nghal a ni.

MIMA hruaitute hian Rail lo lut tura Mizo hnam him theih nana, Sihhmui VC leh all NGO te nena hma lak hona tur Resolution an lo neih tawh dante an thlen bawk.

Boruak tha tak hnuai inkawmin, ILP Enforce dan tur leh Sawrkar in ruahmanna a lo neihte Home Minister hian sawiin, Home Minister K. Sapdanga'n MIMA hruaitute a lo dawr danah MIMA hruaitute an lawm hle a, Sawrkar-ah beiseina sang tak an nei bawk.