Aizawl June 29, 2023: Remna ni champha vawi-37 na puala Information & Public Relations Department, Mizoram Journalist Association (MJA) leh Mizo Photographer’s Society (MPS) buatsaih ni hnih awh tur photo exhibition Vanapa Hall-a neih chu vawiin khan I&PR Minister Lalruatkima’n a hawng.

Photo exhibition hawnna inkhawmah hian Minister Lalruatkima chuan Remna Ni puala photo exhibition buatsaih a ni chu lawmawm a tih thu a sawi a. Mizoram chu kum tam tak a buai hnu ah June ni 30, 1986 khan sawrkar laipui leh hnam pasalthate zarah remna thuthlung ziah a nih tak thu tarlangin remna leh muanna nghahlelh em em chu neih a ni ta a ni, a ti. Kum 20 chuang rambuai ni thin kha remna leh muanna vawnghim tha ber a ni ta chu mipuite zar a ni, a ti a. Sawrkarin mawhphurna keng mahse mipui thawhpuina tel lo chuan remna tluantling neih theih a nih loh thu a sawi.

Thlalak pawimawhna sawiin Lalruatkima chuan, "Hnam rohlu leh tihdanphungte vawnghimtu hlu tak a ni a, hmanlai thil hlu tak tak te phochhuaka chhawmnung zel tu a ni. Thangthar te tan Mizo ziarang leh nihphung vawnthat a ngai hle a ni," tiin hnam tipumkhata hmasawnna thlentu ani tih hre reng turin kalkhawmte a chah. Mizo nunphunga bet nghet tlat ram vah leh sava veh te chu tunlai thangtharte chuan environment tan a pawi tih hriain thlalakna (camera) nen ram an vak tawh zawk a ni a ti a, thilsiamte nen lungrual taka cheng ho tur kan ni tih hre reng a,inrem taka nung ho turin kalkhawmte a chah bawk a ni.

Minister chuan Remna ni pualin kuminah lawmna chi hrang hrang buatsaih a nih thu tarlangin hnam tin te inpumkhatna leh inlungrualna thlen tu ni se a duh thu a sawi a. Mimal, chhungkua leh khawtlanga inrem lo leh inrem theilote tan remna dar vuakna ni ah hmang theuh turin kalkhawmte leh Zoram mipuite a ngen a ni.