Aizawl June 28, 2023: Kum 1986-a Mizo National Front (MNF) leh sawrkar laipuiin remna thuthlung an ziah vawi 37-na pualin vawiin khan MINECO-a Open Gym bulah Chief Minister Zoramthanga hovin ceremonial tree planting (thingtiak phun) hun hman a ni. CM chuan South-East Asia a ralmuang lo ber atangin Mizoram chua state ralmuang ber leh entawn ber a nih tawh thu a sawi.

Chief Minister chuan kum 1986-a MNF leh sawrkar laipuiin remna thuthlung (peace accord) an lo ziah chuan Mizoram-ah remna leh muanna tluantling a thlen thu sawiin Mizorama kum 20 chuang buaina chu a reh thei ta a ni a ti. Rambuai lai chuan Mizoram chu manganna raltitna authawm in a luahkhat thin tih sawiin India hmarchhak mai nilo, Asia khawmualpuia chhim-chhak (South-east Asia) a ram ralmuanglo ber a ni hial a ni a ti. "Tunah chuan hnam sipai huaisente zarah India rama state ralmuang ber leh midangte entawn ber a ni ta hial a ni," tiin ropui a tih thu a sawi.

Zoramthanga chuan Mizoram ralmuanna chu state dang leh ramdangte awh ber a ni tiin Mizoram in thawnchhuah tur a neihte zinga hlu ber pakhat a ni a ti. Ramdang leh state thenawm atanga sahimna zawnga lo lutte chungchang pawh sawi langin khuallian chuan rilru leh taksa damna zawnga rawn kalte chu hmangaihna nena lo tuamhlawm turin kalkhawmte leh Zoram mipuite a chah a, Mizoram chu state ralmuang ber a nih zel theih nan thawhpuiah a sawm bawk a ni.