Mizo nula, Lalremsiami Hmar Zote telna, Indian hmeichhe hockey team chuan chak lova bul an tan hnuah Pathianni zan khan New Zealand hnehin Paris Olympic Games 2024-a inlan turin beiseina an la neih chhunzawm.

Jharkhand khawpui, Ranchi-a FIH Hockey Olympic Qualifiers 2024 khelhah hian Pool B-ah India hian Inrinni zan khan USA chu si khat faiin an lo hneh lo tawh a. Hemi tum hian Remsiami hian bul a tan lo nghe nghe.

Pathianni zana Marang Gomke Jaipal Singh Astroturf Hockey Stadium-ah erawh Mizo nula hian inkhel bul tanin Black Sticks lakah 3-1-in hnehna a chanpui a. Khelh khalh la bakin semifinal luh theihna remchang an la nei.

India tan hian inkhel tan chiahah Sangita Kumari (1’) chuan a vaw lut a, Megan Hull (9’) chuan New Zealand tan sut nghal deuh mai mah se Udita (12’) leh Beauty Dung Dung (14’) ten India tan an vaw lut leh a, mikhual lamin an chhang let thei ta lo a ni.

Khelh khat chak lo tawh Indian nulate hian Paris 2024 Olympics atan beisei an nei thar leh ta a. Qualifier khelhah hian a sang pathumin French khawpui hi an kal thei dawn a ni.

Ram riat inelnaah hian pool hnihah inthenin a sang pahnih ve vein semifinal an lut ang a, final khel ram hnih bakah pathumnain July-August-ah Olympic Games an khel dawn a ni.

India hi an group-ah pathumna an nei mek a, point thum an hmu tawh a. New Zealand pawhin a hmaa Italy an hneh tawh avangin point thum tho an nei tawh a, goal difference (+1) inang chiah mah se goal thun tamah India hian an phak lo thung.

World No. 7 India hian Thawhlehniah vawi hnih tlawm tawh leh an group-a hniam ber, Italy an hmachhawn leh dawn a, New Zealand leh USA an inhmachhawn dawn thung.

Inkhel hnuhnung berah hian India leh New Zealand hian hnehna an chang a nih chuan USA nen an pathumin point ruk theuh an nei dawn a, semifinal lut turin goal thun tam a hlu dawn tihna a ni a. New Zealand hi an tlawma Indian nulaten hnehna an chan erawh chuan a thiam pali zingah an tel thei nghal dawn a ni.