Aizawl August 16, 2022 : Commonwealth Games 2022, Birmingham, England-a neih zawh taka Bronze medal latu Lalremsimi chuan khawvel huap inelnaah Mizo tan kawng a inhawng chho tan niin a hriat thu a sawi a, Mizo thalaite lakah beiseina sang tak a neih thu a sawi. Nimin khan Remsiami hian Lengpui Airport rawn thlengin, amah lawmna hun hman a nih hnuah Kolasib a pan nghal a ni.

Nimina thuthar lakhawmtute a hmachhawn naah Remsiami hiann Semi-final luh nana Canada laka a an chakna goal a thun chu Mizo mipuite tawngtaina rah a nih thu a sawi. "Mizo mipui ten min tawngtaipui nasa tih ka hriat hian keimah hian inrintawkna ka neih phah thin a ni," a ti. Medal a hawn chu a mimal ta a nih loh thu sawiin, "ka ta bik a ni lo, kan vazaia tan  a ni. Mizo mipuite ta a ni," a ti.

Remsiami chuan Mizo te tan khawvel huap inelnaah kawng inhawnga a ngaih thu asawiin, "Medal kan la chho tawh dawnin ka hria, ka thalai pui te hetiang lama kal zel turin ka sawm a ni," a ti a, Mizo pahnih Commonweaith games a tel ten medal an la thei chu lawmawm a tih thu a sawi bawk.

Mizo hmeichhe zinga Olympic khel hmasaber Remsiami chuan, tun tum games-ah khan Gold medal lak an inbeisei thu a sawi a, semi-final-a an hneh loh Australia kha hneh thei ngei an nih thu a sawi a, vanduai zawka an tangah a ngah thu a sawi. Press mite zawhna chhangin tuna Bronze medal dawn-ah an lawm tawk niin a sawi a, a dawt lehah chuan Gold medal lak ngei an tum thu a sawi bawk.