Aizawl : Covid-19 hrik enna ZMC atanga test report an tichhuah dan kalphung chu LLTF thenkhat te chuan fuh tawk lovin an hria a, tihsual palh tam tak awm thei niin an ngai a, test report an pekchhuahna lehkha hi a chipchiar tawk loh avangin result in hrilh sual awm thei niin an hria.

Test report-ah hian an test sak hming bakah hian an nihna lan theihna a lang lo a, Address mumal a lan loh chu thuhran ni se, an veng hming pawh tarlan a ni lo a, Sample ID, kum leh mipa/hmeichhia an nihna chiah tarlan a ni. Test report atanga a lan danah Aizawl-ah hi chuan an Address hriat theih dan hnaivai ber chu Aizawl West emaw Aizawl East emaw a ni deuh tawp.

Aizawl-a LLTF pakhat chuan an hnena test report rawn thleng si, an huam chhung quarantine centre-a mihring hming awm miah lo an dawng nual niin ZALEN an hrilh a, a tih ngaihna pawh an hriat loh thu an sawi. "An hming a chuang a, an Sample ID lah keini lam tan hriat ngaihna a awm lo a, an kum bakah mipa/hmeichhia an nihna a chuang leh ringawt a, tih ngaihna kan hre lo," tiin, an veng Sub-Centre atanga result rawn hlantu Health Worker hnenah an pek kir leh ringawt thu a sawi.

Community Quarantine centre leh Home Quarantine te Swab test en sak an nih dawn hian ZMC lam chuan an Address-ah hian phut chin an nei a, hetah hian, quarantine tur hming bakah, an kum, an Quarantine Centre adress, khung hran an nih ni leh an chhuah ni tur te, khawi atanga rawn kal nge an nih leh an phone number te lak tel a ni. Mahse, test report-ah hian an hming bak hi tarlan a ni lo a ni.

H&FW Dept. hian Aizawl bik hi East leh West in an then a, Aizawl khawpui huam chhung bikah West ah veng 16, East-ah veng 15 awmin heng an huam chhungah hian veng hming lang lo a tam a. West hnuaiah hian Aizawl khaw pawn chinah veng 18 awmin tlak lamah Sairang chu a hla ber niin Sialsuk chu chhim lam tlang dunga khaw tawpna ber a ni. Aizawl pawn khua a East huam chinah hian Tuivawl, Lengteng, Chalfilh leh Tawi constituency te thlengin an tel.