Aizawl May 25, 2023 : India sawrkar-in One Nation One Ration Card (ONORC) programme a kalpui mekah, India khua leh tui tu pawhin ration card tel lo pawhin Ration Card number emaw, Aadhar card number emaw a hriat chuan khawi hmunah pawh ration lak theih. FPS Dealers (Retailer) te'n an lo hnar tur a ni lova, an Ration Card an lo dil kher tur a ni lo bawk.

ONORC hnuaia ration lak (transaction) hi Central Sawrkar chuan a tam thei ang ber nei turin state tin te a nawr reng a ni. Hetiang hi a kalphung a nih avang hian Manipur atanga Mizorama rawn raltlan te pawh an ration quota pangngai chan lovin an bulhnai Fair Price Shop (Retailer) ah an la thei a. Hei hi FPS Dealers (Retailer) te'n an lo hnar tur a nilova, an Ration Card an lo dil kher tur a ni lo bawk.

Ministry of Consumer Affairs, Food & Public Distribution, Department of Food & Public Distribution, Government of India thuchhuak angin One Nation One Ration Card (ONORC) programme hnuaiah migrant NFSA beneficiaries (AAY & PHH) te'n India ram khawi hmunah pawh an ration buhfai an la thei tawh. Hemi atan hian FPS Dealears (Retailer) te'n buhfai an mamawh belh anih chuan an ePoS device hmangin an mamawh belh zat an thlen tur a ni.

India sawrkar chuan One Nation One Ration Card (ONORC) programme hi a ngai pawimawh a. He program hi State tin te chu kalpui turin thu a pe fo tawh a ni. Food, Civil Supplies & Consumer Affairs Department chuan Mizoram chhunga Buhfaisem (Retailer) te chu Office Thupek chhuahin a hriattir leh tawh a ni.