September 25, 2023; Centre for Environment & Social Justice chuan ram lei leh hralh chungchang ah dan anga hmala turin Revenue hotute an ngen.

Vawiin a Revenue Secretary/Commissioner hnena ngenna an thlen a an tarlan danin, tunlai hian chhan hrang hrang avanga state dang leh ram dang atanga Mizoram rawn lut ten ram an lei nasat thu a thang nasa hle a, hmun thenkhatah phei chuan in sawmnga (50) sak theih a, hmun khata awm khawm nan ram an zawng tih kan hria a ni.

Mizoram hi Zo chi peng, ram dang leh state danga awmte’n an Inpui a ni tih an pawm chuan keini pawhin kan pawm. Amaherawh chu, chhan hrang hrang vanga state dang leh ram dang atanga lo kal te hian, Mizoram inrelbawl dan leh khawtlang kalphung (political, social and cultural norms) an zawm tur a ni a.

He ram danpui leh a hnuaia dan hrang hrangte pawh an pawi sa in an zah tur a ni. Chutianga awm tura kan beisei a nih erawh chuan keimahni hian kan khawtlang dan leh ram dan ding laite kan kenkawh that hle a ngai thung a. Dan kenkawh khauh a ngai a ni tih an tarlang. Heng ram lei leh hralh chungchangah hian, a hralhtu leh a lei tute hian ‘The Mizoram Land Revenue Act, 2013 bung kua (9) Section-98 clause 1 to 5’ nasa takin an bawhchhia tih tarlang bawkin, hei hian kan ram inrelbawlna a palzutin a zah lo a.

Tin, heng khaw khat daih inbawk khawm tumna awm anga lang hian, chibil ang zawnga inbawl hranna leh inlak hran tumna a thlen thei a, a rang thei ang bera tih tawp vat a ngai a ni.

Dan thlawhchhan tur tha tak kan nei chunga hetiang ang thil ngawihbo san hi thil thiang pawh a ni lo.

Chuvangin a duh duhin ram an hralh leh an lei hi he dan hmang ngeia ti tawp turin kan ngen che a, tun chinah ram lei leh hralh hi dan hnuaia kal pui tawh tura arang thei ang bera hmala turin kan ngen bawk a che, tiin an tarlang bawk.