ZALEN: 22nd, July 2023: Regional Institute of Medical Sciences chuan Mizoram zirlaite chu duty leh class kal an nih loh chuan an hostel chhuahsan lo turin a chah niin AMMSU hruaitu chuan ZALEN an hrilh a. He thu ziah lai thleng hian RIMS campus chhung pawh a ralmuang hrih niin a sawi a, hmalam hun erawh sawi har an tih thu a sawi bawk.

All Mizoram Medical Students' Union President tuna RIMS, Imphal-a awm mek chuan  ZALEN hrilhin,"He thu hi vawiinah (July 22) kan hria a, hetia hrilh kan nih hnu pawh hian campus chhungah buaina a thlen kan hre loa, nunphung pangngaiin kan awm hrih a ni", tiin a sawi a. "Hetia RIMS hotu lamte'n an tihna chhan hi chu kan sahimna atan ni berin ka hria." a ti bawk.

NGO te'n kawngzawh an tum thu leh MSU in Meitei te census neih an tum thu a darh vang khan zirlai thenkhat Mizoram-ah an haw tan a, boruak awm zel dan tur hi tun maiah chuan hriatthiam a la harsa nia a hriat thu a sawi a ni.

"Ka hriatsual loh chuan nimin khan 10 vel Mizoram lamah an haw a. Naktuk lamah pawh haw tum an awm niin kan hria" a ti a. A hriat theih chinah tunah hian zirlai la haw lo 90 bawr vel an la awm a ni. 

RIMS a zirlaite hi MBBS, BDS, BSc Nursing, PG, M phil, BASLP zir mek nia hriat an ni.

"May thla buai a chhuah hnu khan offline a class tan tawh tur an tih avangin Manipur lamah kan kir leh a. Mizoram zirlai kan nih thu leh Mizo kan nih thu kan sawi chuan min tibuai ngai lo," a ti bawk.