Aizawl January 25, 2023: MPCC Wednesday Discussion Programme vawiina Congress Bhavan, Aizawl-a neih neiin Ration buhfai chungchang an sawiho a, he hunah hian MPCC General Secretary Lalrindika Ralte, MLA chuan tun aia sawrkarin sum seng tlem zawka mipui hnena buhfai pek dan tur a hriat thu leh ration buhfai buk tling lova mipui ten an la thin chu pawi a tih thu a sawi.

Rindika hian sawrkar tana sum sen tlemna tur a hriat thu sawiin, “Kan hriatna te, kan veina te, kan thiamnate hi ram leh hnam tan te, mahni mihring puite tana hlawk zawk leh tha zawka hmang tur kan ni a. Kan finna leh mi aia kan sanna te hi mahni hma sialna tur a ni lo. Pathian zarah Congress Party-in sawrkarna kan chang a nih chuan hei aia tha zawk, hei aia sawrkarin sum a sen tlem zawkna tur leh mipui hlimna tur zawka mipui a buhfai pek dan tur kan hria,” a ti bawk.

Ration buhfai buk tling lo chungchang sawiin Hachhek bialtu MLA chuan, “Ration buhfai chungchangah hian a buk tling lo hi a veiawm ka ti hle. Tunah hian Mizoram pumah ration card 2,82,483 a awm a, ngun taka kan lei zatte leh kan sensote ka chhutin ration card pakhatah kg. 1 in tling lo ta se, Mizoram puma a tlin lohna chu kg. 2,80,000 vel a ni tihna a ni. Tunah hian kg. 1 Rs. 27.50 in sawrkarin a lei a, sum luangral zat hi a tam lutuk. Ration card pakhatah kg. 4/5 ten buk a tling lo tih ka hria a, hetiang a chhut dawn phei chuan sum bothlau tak tak zat chu a tam hle ang. He thil hi a ven theih a, a tih bo theih tih chiang takin ka hria. Buhfai buk hi a tling tur a ni ringawt, mipuiten an chan tur an chang kim lo hi a dik lo a ni. Buhfai hi sawrkarin a tlinga kan lei a nih chuan a tlingin mipuiah kan pe tur a ni. Mi Thla-a an inkah kai tawh laia buhfai a buk tling lo a lo la sem ringawt pawh hi a dik thei lo, kan theih loh hi a te lutuk. Thil dik lo hi kan haw tur a ni” a ti bawk.

Lalrindika Ralte chuan, “Congress sawrkar lai khan buhfai subsidised nan  thla khatah cheng vaibelchhe 10 dawnlai a sengral thin a. Ngun taka ka zirna atangin hei hi tih tlem theih niin ka hria a. Sawrkarin economic cost-in buhfai a lei thin a, a duh chuan open market atangin man tlawm zawkin a lei thei tih ka hria a. Sawrkar hotute dawrin, theihtawpin hma ka la a, sawrkarin economic cost-a FCI atanga a lei thin aia tlawmin dan ang thlapin open market atangin a lei ta a ni. Hei hi Politics a inpuhmawhna a awm thin a, keiman ka supply zui tak avangin sawrkarin keimah min duhsak bik angin an sawi thin a, mahse a ni lo tih ka sawi duh a ni. Congress sawrkar khan min duhsak bik vang a ni lo, man tlawm zawka ka pek theih vang chauh a ni,” a ti.